新銀集團（988）近期股價有異動，上周四及周五分別都升逾3成，兩日股價升超過1.20元，市值兩日暴增咗近3億元。睇通告，發現呢隻前稱明珠興業嘅問題股公布業績「勁賺」5億幾銀，因此有人話佢PE僅1倍多，好抵買云云，真係令人啼笑皆非。
新銀03年因為被兩名債權人呈請清盤，追討合共6188萬元，其後停牌兩年多，至去年10月才復牌。根據去年10月業績報告，此股總資產值減去流動負債是負5.71億元，嚴重資不抵債，每股資產淨值是零，本來早已清盤了事，後來獲商人李耀湘出手打救，才得以復牌。
根據重組協議，新銀透過進行一連串股本重組（1000合1）、債務重組及配售新股，包括向新主席李耀湘及大福配售新股，集得約2億元的新資金，1億元會償還兩債權人，總負債註銷後，還有1億元營運資金。
因此，上周所見業績之5.5億元盈利，只不過是削債後會計賬目上所見之數字，並無真正現金落袋。類似瀕臨清盤而獲白武士拯救的例子有長城數碼（689），改名長盈後同江銅（358）合作搞陽極銅生產，至於新銀呢隻殼會搞乜，暫時未有眉目，不過前大股東黃坤沾手過嘅股票，始終令人有戒心。
講到重組削債，富豪（078）母公司世紀城市（355）可以講係上市公司經典例子，集團98年金融風暴過後，債務重組搞咗6年，到04年底至完成。當時集團先以部份富豪股份，以及若干物業轉讓予債權人償債，再透過發行世城的可換股可贖回優先股，削債超過6成。
世城沽壓有待消化
呢筆賬估唔到今時今日仲有債權銀行持有世城股份未沽晒出街，本月交行香港分行忽然沽出70球貨，頓令轉型嘅世城股價易跌難升，但係換個角度，邊個接咗咁大批貨呢？相信消化完呢批沽壓後，世城至係真正起動嘅時候。
歐陽風