美國女性對財富嘅控制權越嚟越大，《FastCompany》首任總編輯韋伯（AlanM.Webber）話，花旗國女性現時持有超過五成美股；到2010年，擁有嘅財產將高達14萬億美元（約109.2萬億港元），佔美國私有財產五成；到2020年，隨着金錢持續由男性轉到女性手中，當地女性擁有嘅資產可能增至22萬億美元。
MuscleUp喺《MSN討論區》大呻：「美國法律偏幫女人，加上法官對女性太仁慈，令當地婦女越嚟越有錢，男人遲早會冇碇企。美國稅制對男性好唔公平，一旦離婚，男士要畀贍養費同供養仔女，種種原因令男性嘅身家縮水。」
法律偏幫 財富由男轉女
佢又話：「雖然美國女性嘅工資似乎低過男性，但如果考慮到分娩假、超時工作、教育水平等因素，女人嘅薪金其實追得上男人。」佢又不滿美國現時有成54%選民係女性，令佢哋可以透過投票去控制經濟。」仲呼籲美國男士們站起來，支持男士權益組織『全國男士平等議會』（NationalMen'sEqualityCongress）。」
financiallyfit反駁：「𠵱家好多職業女性放工後，仲要煮飯同湊細路，壓力好大，所以老公應該畀多啲錢老婆。」佢同時澄清，贍養費唔一定係由男人畀，如果離婚男士係住家男人，而前妻要返工，呢位男士通常可以攞到贍養費。
美國婦女促進會（Catalyst）就不滿美國企業高層嘅女性成員太少。調查發現，喺「財富500強企業」嘅高層入面，女性成員嘅比率喺05年只有16.4%，到06年更降至15.6%。