九七前地產狂潮下不少人一夜富貴，深水埗地踎地產公司女經紀卿姐靠炒樓炒出幾百萬身家，可惜一場金融風暴將她打回原形。自言不怕捱的她轉行開餃子店，又遇上沙士疫症差點結業，幾年艱苦守業小店終上軌道。從前炒樓揸鑊鏟，現時變身餃子皇后，回歸十年人生經歷起起跌跌的卿姐自言：「富貴於我如浮雲，𠵱家搵到兩餐總算託賴。」 記者：林熊、張珮琪
「我93年喺表哥深水埗開嘅地產公司做經紀，嗰幾年樓市係咁升，生意真係唔憂做，一個月做幾單買賣，自己炒吓樓，今日摸貨，聽日轉售，賺錢十分easy。」人家炒豪宅，卿姐炒的卻是唐樓，雖則價錢差幾皮，但她看中唐樓不乏買家。「你咪以為深水埗唐樓冇肉食，最風光一役係賣一個1,000平方呎單位，我轉手賣出賺一筆，加埋買家嘅打賞一鋪賺咗10萬，開心到笑！」
「當時心雄㗎，自己入市炒埋一份，95至97年間係高峯期，我有300萬現金同4個單位揸手。」卿姐丈夫盧先生任職裝修判頭，日賺三、五千好平常，兩夫婦揮金如土「嗰時使錢好豪，買嘢要名牌，鞋要着Clarks，Timberland，幾千蚊一件褸，濕濕碎。」
一場金融風暴，一切化為烏有，股市、樓市大跌，「層樓賣一層蝕一層，97前用咗290幾萬買深水埗青山道紅裕大廈兩個單位，仲將之打通準備放售，最後只能以170萬賣出，蝕咗一半呀！當時持有嘅4個單位最後分批斬纜賣出，倒蝕300萬，打回原形！」
樓市低迷、建築業不景，卿姐丈夫冇工開手停口停，一家陷入困境，獨生子又得8歲，前路茫茫。2002年卿姐拿出僅有積蓄盡地一煲開餃子店，兩夫婦老闆、夥計一腳踢，卿姐負責煲湯底、切菜、剁肉兼包餃，丈夫主管廚房煮麵。小店生意未企穩，世紀疫症沙士又到臨。
「每日包5000餃子」
「03年沙士嗰陣，我哋試過賣10蚊碗水餃，當年有三個月係白做，每日得1,000元生意，夠交舖租，又唔夠畀人工，你有冇聽過客人會拎紮菜嚟叫你幫佢淥，連買碟油菜都慳番，對方仲要係熟客，我做到冇心機，諗過放棄，但自己人到中年唔易搵工，惟有頂硬上。」
「呢幾年，每日工作16小時，日包5,000隻餃子，真係包到手軟。我今年45歲，好彩金融風暴嚟得快，若果現在才遇到呢個咁大嘅挫折，都唔知自己仲有冇能力振作過嚟！」
卿姐每朝10時開舖，直踩午市及下午茶時段，傳菜、打雜、收錢一腳踢；下午3點工人落場休息，是卿姐一展餃子皇后功架黃金時間，這時候她會拿出大盤肉餡包餃，為晚市補充餃子貨源。傍晚時分，卿姐丈夫到來，她工作至晚上10時才回家休息。
「我最拿手包韭菜餃同菜肉餃，餃子皮要薄，有彈性。其實我86年由廣州來港前一直有賣餃子，當時已經係萬元戶，來港後反而要捱，之前做經紀就靠炒樓揸鑊鏟，後來至發現已經好耐冇包餃子畀屋企人食，我𠵱家密密包餃唔停手，雖則好攰、但感覺踏實好多，辛苦得嚟錢都值得。」
「老公讚我最開心」
回首前事，卿姐坦言獲益良多，「金融風暴前大家都冇危機感，經過咁大教訓，我哋𠵱家好慳，樣樣計住計住，衣物、電器全部用大陸貨，平日好少出街食飯，唔平嗰間都唔去。我算係轉型成功啦，舖頭捱到𠵱家，我哋只係低下階層，搵到兩餐算係託賴。」
勞碌半生，由一夜致富到日做16小時，卿姐感到開心嗎？「開心，每當老公讚我包嘅餃子好食，手勢最好，我就最開心啦！」
回歸10年倒數61日