世城系經歷97年金融風暴，花咗7年做債務重組，近幾年休養生息，今年初成功分拆富豪產託上市，為富豪清還40億債，世紀城市最近又話變身資源股。62歲嘅主席羅旭瑞似乎永不言休。
華華聽聞，羅旭瑞係「朝十晚十一」嘅老闆，所有新項目都經佢過目，就連放假，佢都係去睇建築物同酒店。
雖然羅旭瑞係工作狂，但一講到寶貝女羅寶文就變番爸爸，好似個女讀初中時替高中同學參加辯論比賽獲表揚、跳班讀大學等，爸爸如數家珍。
對於阿女羅寶文27歲仲未拍拖，羅旭瑞亦唔太擔心，唔會夾硬介紹男仔畀個女，話𠵱家唔興喎，但轉頭講笑話記者識得人多，問華華有冇好介紹。