「有得揀，你至係老闆。」呢句Slogan雖然Out咗啲，不過又確係幾有道理。我哋師奶經常買嘢，但係都要買得精明！平，唔一定係抵，仲要有質素。價錢差唔多，仲係高級貨，唔使多講，係人都識揀。講咗咁耐，其實想話你知日本人氣百貨APITA明日開張，貨品有質素，仲有幾項獨有服務，務求成功插旗搶客。
記者：梁學文
攝影：陳陶鈞、譚盈傑
Model：Claudi
日本4大百貨之一、在日本擁有70間分店的APITA明日正式開張大吉，以後又多個可以買到日本貨的地方。新店佔地20萬平方呎，共4層，集服裝、家品、超市、電器於一身，擺到明主打超級市場，貨品有7成都係日本直接入口，不過要買最抵靚嘢，當然要先做定格價比拼。
跟康怡JUSCO小比拼
APITA開喺太古城，跟附近另一家日式百貨吉之島JUSCO打對台，不過APITA明顯稍勝一籌，比較過貨品及環境，發現APITA的價錢雖然貴1成，不過貨品款式和數量就多2成選擇。
環境
APITAwin
APITA的環境明顯較闊落光猛，貨架特別降低，令室內空間感同光猛度都大增。通道夠闊，就算放咗3架大Trolley或5架細手推車，都唔會覺得好逼；相反，JUSCO地方冇咁大，通道唔夠闊，而且整個超市籠罩着一陣異味。
貨品款式
APITAwin
APITA的貨品款式較多，超過7成貨品來自日本，而JUSCO都有日式貨品，不過種類唔及APITA多。而APITA有鮮魚架，每個禮拜都有日本鮮魚返貨，JUSCO則欠奉。
價錢
JUSCOwin
JUSCO貨品的價錢平少少，不過要小心某些講到明係會員價，即係話要入會至有得平。而APITA的定價高1至兩成，就無分會員非會員，一視同仁。
服務
APITAwin
APITA幾個獨有的服務明顯贏成條街，尤其是買冷藏食品時，特設的自助冷凍服務就更加無懈可擊。不過JUSCO設有兒童專用手推車，亦挽回些少分數。兩者都有送貨服務。
貨品價錢小比拼
APITA的貨品以日本進口貨為主，價錢比JUSCO貴1至2成，款式有更多選擇，且是獨家發售，在JUSCO唔會搵得到，所以只能以同類貨品作比較。
冷藏食品
豚肉叮叮飯
APITA$30
JUSCO$24.8
APITA的價錢是比較高一點，但選擇就多好多。
洗衣粉
潔霸洗衣粉2.5kg
APITA$39.9
JUSCO$39.9
吉之島的價錢是會員價，非會員價要$42.9，APITA就一視同仁，略勝一籌。
魚 類
紅衫魚
APITA$6.8/100g
JUSCO$5.9/100g
APITA每日都有本地新鮮的海鮮供應，亦有由日本進口的鮮魚。JUSCO只賣冰鮮魚，價錢較平。
4大貼心服務
1.蓄冷劑保食物唔變壞
平時去超市買菜、買肉又買條魚，夏天逼車又逼人，貨品拎到返屋企有時會有陣味，甚至乎變壞唔食得。為咗解決呢個問題，APITA加設蓄冷劑設備，只要將專用的蓄冷劑放入新鮮食物旁邊，就可以保持低溫，唔怕食物變壞。
收費：$50/蓄冷劑（蓄冷劑於超市內有售，購買後可於2個月內無限次使用。）
2.RO純水機提供純淨食水
RO純水其實是利用無數超微細孔的人工半透膜，將清水中的雜質過濾。RO純水能夠帶出食物的原味，而且水入面沒有雜質，飲得健康，用來煮餸食得安心。
收費：$60/專用樽、$10/3.8公升（專用樽可以喺服務台買得到，$10可以買1次，1次有3.8公升。）
3.冷藏儲物櫃keep住戰利品再行過
去超市買完嘢，仲想行街Shopping，如果拎住一袋二袋都幾煩，最煩係有魚有肉，所以APITA就有免費Locker提供，分開普通同有冷藏功能兩種。
4.自助製冰機免費保鮮
如果唔想買蓄冷劑，呢度都有冰塊提供，仲係免費的。
精選勁抵貨品
為咗慶祝新開張，即日至5月8日都會有大減價，超市同家品的部份貨品仲低至3折。
4.5L象印真空煲
四五折$799
原價$1,788
雖然唔係新款，唔使睇火自己保溫，朝早返工煲一煲，放工返屋企就有得飲，正宗日本貨有特價，抵買！
不銹鋼水煲
特價$99
原價$209
攞上手已覺得幾真材實料，實實淨淨，一百蚊唔使，啱晒兩口家庭，值得入貨！
日本睡拖
特價$29.9起
原價$59
日本入口的睡拖有多個款式，男女Size都齊。
0.4L廸士尼水壺
二五折$99
原價$388
廸士尼水壺有多個款式可以揀。
日本象印0.36L保暖杯
四二折$169
原價$398
雖然夏天就到，保暖杯唔止可以保暖，保冷一樣得，買嚟返學或者去旅行用都得。
廸士尼刨冰機
二九折$99
原價$338
夏天就快到，買定個刨冰機放屋企，隨時有刨冰食。
有咩要改善
APITA雖然新，而且裝修好，但都唔係零缺點，以下幾點可以改善就更好：
1.冷藏Locker唔夠多
冷藏的Locker只有10個，好多人爭，尤其夏天一到，個個爭用就會爭崩頭，到時就變成煩人的服務。
2.場內分區指示唔清晰
新開張好多人唔熟路，地方又大，搵起嘢上嚟都幾一頭霧水。
街坊都支持
APITA（28850331）
地址：太古城中心地庫
營業時間：10am-11pm