原來蔡瀾不但識飲識食識去街市買靚餸，就連整容也有不少「窿路」。年屆73歲的「黃梅調歌后」靜婷，讀書時經常被同學仔、包括中國著名畫家張大千之子等挖苦面上滿布豆皮，入行後遂找蔡瀾帶她到日本整容。最後靜婷因為怕有後遺症，以及蔡瀾一句「整開有癮」提醒而臨崖勒馬，她笑說：「反正自己整極都冇用，都係咁醜樣！」撰文：戴彩煥
曾演唱《江山美人》和《梁山伯與祝英台》等經典黃梅調的靜婷，小時因患天花，在面上留下疤痕，讀書時更經常成為同學仔的笑柄，特別是在成都讀小學那段日子最令她難受。靜婷日前接受本報專訪時說：「讀小學嗰陣，張大千個仔係我同班同學，佢成日笑我塊面有豆皮，我真係好嬲佢。」
怕手術失敗留痕
愛美是女人天性，時下不少女星為變靚啲而整容加工，靜婷也不例外，當年她加入樂壇後，原來不下數次想過整容，但到最後關頭還是臨崖勒馬。靜婷說：「我好想整走啲豆皮，試過一年我同凌波去台灣登台，我同蔡瀾講（當年同行的邵氏代表）話想去日本整容，佢真係帶咗我由台灣直飛去日本一間醫院，原來好多女星都喺嗰間醫院整過，但邊個我就費事出聲啦。」
靜婷續說：「嗰陣醫生同我講，話同我做完手術之後6個月要返去睇多次，又話如果手術成功嘅話就乜嘢顏色都冇，唔好嘅話就會灰灰啡啡，咁就死啦！我即刻唔制！後來班朋友去美國整容，自己又心思思跟埋去，但最後都係冇整到。蔡瀾當年都有同我講，話：『靜婷你唔好啦（整容），整開有癮㗎。』自己又想靚又驚，但諗真啲都係覺得自然啲好，反正自己整極都冇用，都係咁醜樣！」
不忿六嬸諗縮數
入行多年，靜婷為邵氏唱過數百首電影主題曲和插曲，合作無間。對於邵氏揸fit人邵逸夫（六叔），靜婷大讚對方是個有頭腦、有魄力及十分勤力的人，當年從早到晚也會見到對方巡廠。但一提到六叔現任太太方逸華時，靜婷卻有點不是味兒：「我同邵氏合約滿之後，六叔叫我續約我都唔續，因為方逸華叉咗隻腳落去，嗰陣時唱歌，一直都係幾個主角幾個和唱各一份錢，但佢（方逸華）唔係，佢畀一嚿錢幾個人分，我話咁我唔唱喇，你唱埋我嗰份！」
76年，靜婷曾為李翰祥執導電影《瀛台泣血》唱主題曲，但因錄出來效果欠佳而棄掉，靜婷說：「嗰時編曲嗰個好唔掂，錄首歌錄成6個鐘，又唔識搵人和唱，叫我幫佢搵，我就搵咗一班人幫佢和唱，點知後尾方逸華打電話畀我，話首歌用唔到，所以唔畀錢，你話公唔公平？隻歌唔得，錯不在我，係編曲問題，關我乜事？我話至多我重唱唔收錢，但係班和音一定要畀，寧願再錄嘅話叫佢哋收平啲，佢話唔得。嗰陣時唱一隻歌和音幾十蚊之嘛，佢唔講道理，我都唔再同佢講落去！」
時下歌手欠水準
入行以來，靜婷沒一刻像她名字般，靜靜的停下來，今日的她，仍不時會登台唱歌、擔任演唱會嘉賓，出席各大小活動，或是跟一班老歌迷舉行聚會，生活多姿多采。問她可曾考慮開班授徒教唱歌？她笑說：「我都係無師自通，費事誤人子弟啦！」
當年做歌手的，除擁有一把靚聲外，更要咬字清楚和懂得睇樂譜，但靜婷認為時下的歌手連這兩個基本條件都欠奉，她說：「𠵱家啲歌手好多係包裝出嚟，冇咗自己，又唔識睇譜，咬字又唔清楚，你要聽到歌手唱乜嘢，先至感受到歌曲意境，但𠵱家淨係見到人哋口噏噏，唔睇字幕真係唔知唱乜！我哋老人家年紀大，眼力冇咁好，未必真係睇到字幕㗎嘛！」
本欄逢周二刊出
攝影：陳偉權
場地：霞飛路
