「對人歡笑，背人垂淚」係以前描寫歡場女子嘅寫照；𠵱家仲係咪咁華華都唔敢講；但「對人垂淚，背人歡笑」就可能係以下呢位富豪契仔嘅寫照。呢位契仔一直以來得到富豪照顧，可以話係無憂。多年嚟，契仔話就話做生意，但噏極都噏唔出自己做乜嗰隻，真係唔知恨死幾多人。
前排富豪過身，契仔當然有份送殯，佢當然好錫富豪，喺黑超之下見到佢眼鼻通紅，真係人唔傷心就唔流淚。不過，黃埔灘蒲界一族講，響富豪釘蓋後第二晚，雖然係假期，但大家諗住成日將富豪掛嘴邊嘅契仔，一定留響香港忙於幫富豪辦身後事，點知一個屈尾十，經已見到契仔喺嗰邊蒲頭，而且係一如既往咁劈酒𠝹女，high到好似解脫咁！有蒲友話見佢high成咁，仲以為𠵱家興未出殯先解穢呢！
口痕友話，契仔唔傷心可能有幾個原因，第一，可能佢覺得富豪一把年紀，個病又冇得醫，長痛不如短痛；其二，可能佢知道自己冇可能同人爭家產；其三，可能一早已經分夠。