喺美國人眼中，到底點至係最佳股票組合？《華爾街日報》網上版一項調查顯示，有份投票嘅3000人當中，超過半數受訪者認為最佳嘅投資組合，就係買75%美股加25%海外股票，有三成人就覺得最好兩者各佔一半。
難掌握海外股票走勢
網友laurenfoster喺討論區留言話：「以短期嚟講，美元下跌有助海外公司嘅股價跑贏大市，加上國外嘅經濟狀況似乎比較好，所以我會加重海外股票投資，至各佔一半比例。」
RogerTheriault就覺得要攞到外國公司嘅第一手資料並唔容易，所以比較難掌握股價走勢。但有網友唔同意，crodby話：「我覺得海外股票嘅表現似乎比較好，所以會選擇買外地基金。老實講，我唔會為咗分散投資風險而同時買本地及海外股，只會買幾隻抗跌力較強嘅股票，話之佢係美股定係海外股。」
「賺到錢就係好投資組合」
不過，網友romesh就話：「隻股點樣界定係美國定外國？埃克森美孚算係美國股嗎？佢有超過50%盈利係嚟自海外。微軟嘅軟件同硬件，全球都有得賣，佢又算唔算係美國股呢？佢哋都會受滙價波動所影響。計我話，𠵱家仲使乜分美國股定係外國股，最緊要係賺得到錢。」fszabo1亦認同：「總之，賺到錢就係最好嘅投資組合。」