湊細路是一門高深學問，未做爹哋媽咪的古巨基與蔡卓妍（阿Sa）經過昨日一役後應深明此道。兩人昨分別手抱一歲多的反斗B出席活動，阿Sa所抱的BB驚到嘔奶，另一個則在基仔懷中大玩蜈蚣彈兼給他「兜巴星」，兩人的狼狽模樣跟爹哋級的陳奕迅（Eason）瀟灑地單手抱B相映成趣。
陳奕迅、古巨基、蔡卓妍、鄧麗欣、關心妍及梁漢文等近50位歌手，昨日出席在中環舉行的「MOOV一大個生日會」，眾歌手準備搖搖木馬、奶樽及公仔到賀。
蜈蚣彈掙扎欲逃
壓軸出場的Eason、基仔及阿Sa手抱BB上台，Eason瀟灑地單手抱住B女，更指揮她望鏡拍照，基仔及阿Sa則顯得手忙腳亂，基仔手抱的BB不停作空中蜈蚣彈，掙扎欲逃，又拍打基仔的臉，阿Sa則被BB抓傷手臂，BB的小手還不經意地觸摸阿Sa的胸部，之後更害怕得吐奶嘴嘔奶。當阿Sa拾起奶嘴時，全場即大叫：「唔好畀BB食奶嘴！」最後BB幾經「搏鬥」後，終於成功「逃脫」，往後台尋找父母，Eason則抱着BB，指着遺留在台上的嘔吐物，場面搞笑。
事後基仔與阿Sa表示上台前已用盡方法𠱁BB，阿Sa說：「我已經請佢食餅同飲汽水，都搞唔掂，我覺得好對唔住個BB，會送番玩具畀佢。」記者笑指BB返屋企會發噩夢，阿Sa笑說：「我驚我會發噩夢。」
遇反斗星照生仔
基仔則笑言未遇過如此好武功的BB，他說：「我不停同佢講我係好人，點知BB用喊嚟回答我。」雖然遇着反斗星，但基仔謂未有因此改變其生育大計。
同場打扮成春麗的鄭融，表示計劃婚後10年內生三個BB，她又謂曾看過國家地理頻道一個節目，得知英國人工受孕技術可選擇BB的性別和性格，她說：「我將來都有興趣試吓，要BB高過五呎五吋，充滿運動細胞同有美貌，總之人見人愛。」
此外，阿Sa昨日接受商台電話訪問，談到在電影《戲王之王》中與詹瑞文一場床上戲，她說：「其實唔係好鹹濕，只係覺得好似冇着衫咁。」她又謂最辛苦是要裝假胸，弄得她腰痠骨痛。
採訪：馬建華
攝影：陳俊強
