繼整容代言人吳文忻同甄穎珊之後，來自深圳、現年24歲嘅「A貨祖兒」譚情，為咗成名同更似容祖兒，早排亦加入蕭定一旗下嘅整容大軍，今個月中去咗韓國七日，全身麻醉接受六項整容手術，包括隆鼻樑、喺耳朵抽取軟骨隆鼻尖、削薄上唇、磨細腮骨、削短下顎骨同埋喺上排六隻牙齒裝牙套。
扮冇整過容
譚情上個禮拜三秘密返港，住喺旺角區一間酒店，第二朝11點幾，戴住漁夫帽同口罩嘅譚情，喺女助手陪同下去粥店食早餐，佢喺鼻樑位置貼咗塊肉色膠布，頭部紮咗繃帶，露出一雙微腫眼睛，食粥時見到佢嘅雙唇腫到有啲反唇。食飽後，譚情買咗部價值3,910蚊嘅NokiaN73黑色手機。返酒店時，記者上前問佢整容情況點，點知佢居然話：「邊有整啫！」後來記者打畀譚情經理人Ceci，佢話：「佢個頭紮住繃帶，係因為整過腮骨同下巴，要用繃帶定位。佢做咗收薄上唇嘅手術，暫時只可以食流質嘢。」據知𠵱家似豬頭多過似天后嘅譚情，已經返咗韶關老家休息，等消腫後先會以新面目示人。
