此日黃昏時候，喺皇九碰到賓架Ｋ一身靚西裝，孭住一個背囊，好有型啫。賓架Ｋ乃𠵱家第二吃香嘅私人銀行家（privatebanker），第一吃香嘅當然係投資銀行家i-banker，不過聽賓架Ｋ講落，佢哋有啲銀行家賺錢仲多過投資賓架噃。最好例子就係王小姐啦，淨係學跳舞都要一億二千萬，投資賓架何來如此闊氣？又有一位唔做銀行，轉投私人家族，替家族管錢、投資嘅賓架，淨係簽約費啫，已係二百萬美元，你估一年人工會多成點？地鐵總裁周松崗爵士年薪多於一千萬港紙，已經被捧上枱，其實周Sir管咁大間機構，咁重要嘅公共交通公司，年薪少過一位私人銀行家嘅signingbonus，公眾人士有乜好嘈呀。
賓架Ｋ成日飛嚟飛去，坐飛機多過左丁山坐地鐵，呢日咁啱碰到佢，於是問佢新加坡點解會成為亞洲瑞士，國際銀行喺新加坡大展拳腳，大肆擴張私人銀行業務呢？賓架Ｋ話新加坡有三個優勢，就係（一）對國際銀行給予稅務優惠；（二）居住環境好，賓架鍾意；（三）廉潔穩定，大存戶有信心，好多歐洲富裕人家將存款搬過去新加坡，費事畀歐盟（主要係法國）抽稅搞搞震。瑞士銀行UBS索性喺新加坡開設私人銀行家訓練學校，一年可訓練五千個學員，規模大到令人難以置信。
香港點解唔夠爭呀？賓架Ｅ只係講一句：「香港係中國地方。」唔肯再解釋。
賓架Ｋ屬老派私人銀行家，講客戶關係，講長期信任，典型嘅代客戶管家產專家，但佢都承認受到競爭壓力，佢話：「新派私人銀行着重產品，請幾十個MBA，叫佢哋推銷結構性金融產品與股票，衍生工具等等，關係屬短期性質，因為一旦連續三個月嘅回報不如理想，就可能畀其他私人銀行搶走客戶，畢竟結構性產品大同小異，幫襯邊間都差唔多，講邊個短期回報好啲啫，我哋就有好耐都冇新產品推出嘞，講求穩健與長期關係，其實係容易畀人搶客㗎。」好彩佢間銀行有百幾年歷史，有好多oldrich客戶，仍然穩坐釣魚船！