兩隻熊貓來港，認真大陣仗，香港市民是否真係咁熱心，目前唔知嘅，要等到熊貓喺海洋公園安定下來之後，睇吓新增入場人數有幾多，先至可以下判斷。
熊貓男取名樂樂，熊貓女叫盈盈，英文譯音就係LeLe，YingYing。呢對名字喺四月二十六日下午公佈，當晚食飯之時，廣告T撞到何志平局長在灣仔鴻星招待內地貴賓，相信係多謝佢哋照顧護送一對熊貓來港啩。廣告T對「樂樂」、「盈盈」呢對名皺眉頭，佢不愧做廣告咁耐，立即連想到營營役役，得個做字，捱而無收穫；兼且「樂樂」與「落落」同音，香港人鍾意「起起」嘅啫，邊度會受落「落落」吖。跟住廣告T又話「樂樂盈盈落晒形！」啋，熊貓來港香港落晒形？想嚇親何局長咩。
據《蘋果日報》講，評定熊貓名字嘅評審委員之中，有查良鏞（金庸）大師。股票W心水清，佢話金庸名著《笑傲江湖》裏面嘅邪教教主任我行，武功蓋世，有一女兒，叫做任盈盈，查大師鍾意「盈盈」呢個名字，有其原因也！「盈」係清晰、美好充滿嘅意思，例如喜氣盈盈、車馬盈門。股壇名嘴L就話佢最怕聽到個落字，講新年快樂佢都要改為「新年快上、快起」，所以佢長嘆一聲話：「樂樂應該改名做喜喜，加起嚟就係喜喜盈盈，又起又有盈餘，你話幾好呢！」人話賭仔姓賴，股市中人亦姓賴，四月二十七日嘅股市一開就「落落」，收市跌咗成一百四十點，名嘴L就話係拜「樂樂」所賜喎！
當然，股市回落嘅主要理由係社保基金獲利回吐，大戶沽A股以鎖定利潤，俗稱「止賺」。中國社保基金副理事長高西慶喺四月二十六日北京一個論壇上（JP摩根投資論壇）發言，話A股升升升，升到唔記得咗有地心吸力呢回事，社保基金根據風險管理原則，沽一批貨先。大戶出貨兼高官出口術喎，A股唔跌吓，咪好唔畀面？又咁啱嘅，跌市適逢「樂樂」到港，我哋股民梗係有嘢賴啦。許仕仁司長未走之前，為隻雄熊貓改名為「喜喜」，安定吓民心都好啩！