中移動（941）雖然業績理想，而且客戶淨增長再創新高，但由於成為大戶舞弄恒指的工具，故股價未見驚喜，如果有一日畀你見到中移動老總，你會點？最近內地網友虛擬世界喺《新華論壇》鋪咗一段中移動老總去公廁嘅笑話。
話說某日喺公廁外面見到一個男人想衝入男廁，負責清潔嘅大嬸大叫：「你做乜嘢？」
「我係中移動老總，人有三急。」
「你唔知道去廁所要畀錢㗎咩？」
「冇問題，幾錢？」
雙向收費 出嚟要畀錢
大嬸話：「入去5毫、出嚟3毫。」
老總睩大眼問：「乜話，出嚟都要收錢？」
「望咩嘢呀望，我哋呢度實行雙向收費。你可以買個廁所套餐，咁就淨計你單向收費嘞！」
急得緊要嘅老總即刻拎十蚊出嚟話：「得，我畀！」
點知大嬸問：「小便定大便？」
老總答：「開大，快啲啦！」
大嬸再推銷：「咁你不如買個辦理套餐啦！買50次大便，送30次。」
忍無可忍嘅老總話：「唔講住，等我入去搞掂咗，即刻出嚟畀錢。」
增值服務 有來人顯示
老總入咗廁所之後，揀咗最後一個廁格，方便完之後出嚟，大嬸同佢講：「先生，你揀咗5號廁格，要畀選號費5毫。你喺裏面方便緊嘅時候，由於冇話明唔要音樂，所以音樂費每次6毫。另外，你喺裏面踎咗15分零1秒，前1分鐘5毫，之後每分鐘4毫，唔夠1分鐘都當1分鐘計。」
「仲有，由於你嘅排泄量佔用咗我哋嘅下水道寬頻，所以要喺月費之外再畀50蚊額外收費。最後，你可以喺廁格門個窿睇到出面有乜嘢人行過，所以要畀『來人顯示費』1蚊。」
過期唔交每日罰0.3%
未等大嬸講完，老總已經呆晒，但大嬸繼續：「你總共要畀五十九個四，呢度冇得碌卡，如果過期唔交，每日罰0.3%，我唔會另行通知；到累積夠1000蚊，就會通過法律程序催繳。」
http://forum.xinhuanet.com/