時間：
94年10月
地點：
無綫電視城
人物：
張智霖、許秋怡
經過：
張智霖（Chilam）同許秋怡92年合唱《現代愛情故事》撻着，翌年袁詠儀（靚靚）同Chilam合作劇集《邊緣浪子》，Chilam移情別戀，佢同秋怡分手後，靚靚94年承認同Chilam拍拖。
94年有消息傳出Chilam喺《勁歌金曲》節目中贏咗條頸鏈，仲送咗畀舊愛秋怡，靚靚收到風即刻嬲到爆。Chilam最初否認，後嚟又改口，搞到滿城風雨。Chilam為咗平息風波，94年特登入電視城化妝間找秋怡晦氣，仲主動要秋怡同記者澄清冇收過條鏈。據知目擊事件嘅人都好戥秋怡唔抵，秋怡當時聽到當然好委屈咁喊起上嚟，仲急急腳逃離現場。情侶再見做唔到朋友冇所謂，但做男人可以大方啲囉。
秋怡96年喺台灣唱新歌《第三者》，忽然有感而發喊起上嚟，再度爆發新仇舊恨，靚靚就指嗰幾年成日接到電話騷擾，呢單都係無頭公案，審死官。
不過，秋怡同Chilam最終各自搵到真愛，秋怡同《小時候》童星王書麒喺03年奉子成婚，生咗個囝囝王綽，佢哋近年夫妻檔返內地登台𢱑銀，一家三口生活幾舒適。Chilam就主攻電影，佢同靚靚嘅愛情長跑舊年仲開花結果，靚靚仲同Chilam生咗個乖仔。一對舊情人各自組成幸福家庭，呢個結局正係現代愛情故事真實版。
本欄逢周一至周六刊出