已婚小生馬德鐘去年先媾郭羨妮，後拖圈外女友遊泰國斷正，最後𠝹女𠝹出禍，遭無綫雪藏，太太張筱蘭更㷫到眼火爆，帶囝囝出走法國。事業大不如前的馬德鐘，趁近日坐冷板櫈終於𦧲掂老婆，前晚破天荒首度帶妻兒出席公開活動睇《蜘蛛俠3》首映禮，大打親情牌圖洗花弗形象。
馬德鐘過去一年先後與「狐妮」郭羨妮、佘詩曼、宣萱和圈外女友Katherine傳出緋聞，去年7月他出入狐妮香閨，三個月後又帶Katherine拖手遊泰國，兩度偷食斷正，與他結婚14年的太太張筱蘭佛都有火，一怒下帶9歲囝囝出走法國，就連無綫也對自毀住家男人形象的馬德鐘大感失望，大幅刪減他在重頭劇《歲月風雲》的戲份。
貼身保護寶貝仔
電視藝員最講求形象健康，38歲的馬德鐘拋妻棄子，由好佬變滾佬，自然備受嫌棄，早前他拍完《歲》劇後已全職量地，星途垂危又面臨家變，幸他及時懸崖勒馬，諗計冧掂老婆，最終箍煲成功，近日馬太趁復活節囝囝放假，專程帶他返港見爹哋。眼見舊愛狐妮介入陶大宇婚姻致離婚收場，馬德鐘執番身彩，即時轉性做廿四孝老竇，日日玩家庭親子樂，前晚更首次一家三口總動員，到中環ifc戲院欣賞《蜘蛛俠3》（Spider-Man3）首映禮。
前晚馬德鐘親率妻兒抵商場後，獨自走到布景板前簽名影相，馬太和囝囝則在另一邊等候，記者發現後即丟低馬德鐘，一窩蜂爭影二人，馬太連隨拖囝囝衝入戲院，其後馬德鐘才入場會合妻兒睇戲。至11時，電影播放完畢，馬氏一家步出戲院，挽着三袋紀念品的馬德鐘一馬當先行前，囝囝黐實他身邊，馬太則微微墮後。
現場所見，9歲的馬仔健碩身形似爹哋，樣貌就較似媽咪。曾任模特兒的張筱蘭身形苗條，稍經打扮也略具星味，她全程跟實丈夫身旁，記者拍照時，她即低頭迴避，囝囝則雙手緊捉父親臂彎，面黑黑的馬德鐘說：「唔好影細路啦，好冇？」
其實馬德鐘入場前早已見大批記者對其妻兒拍照，問他為何不大方影張全家福？他說：「佢哋唔鍾意上鏡。」他表示早前太太攜子北上探班被偷影則無可奈何，接着又風騷大談親子經：「因為個仔鍾意睇呢套戲，我特登帶佢嚟睇，一家三口好少出席呢啲場合，佢哋最近放復活節假返香港，之後會返法國，我拍完《歲月風雲》之後，有啲空閒時間，都會同太太去法國玩吓敍吓。」
挖角潮無福受惠
馬德鐘又忽然自稱與無綫所簽的是部頭約，近日亞視掀挖角潮，至今未曾有人斟他過檔。雖然不知此話是否有放風之意，但刻下無綫未有安排新工作，賦閒在家望天打卦的他，以往接廣告及商場騷接到手軟，但近半年只曾接過一個在深圳舉行的賺錢時裝騷，難怪要靠打親情牌救亡。
採訪、攝影：娛樂突發組、何永寧、陳慧安
最高蘋嬸
馬德鐘都四張有望啦，應該修心養性，畀心機做嘢，唔好再喺情場同人鬥滾女啦，贏咗場交，輸咗個家，值得咩？
蘋果娛樂特派評述員蘋嬸
