八達通普及，毫子如被詛咒生人勿近，大量一角、兩角和五角硬幣流落民間，大小商戶都拒絕收留，家裏積存大量毫子「冇碇使」的網民不禁歎道：「大量一毫、兩毫，可以怎麼辦？」
親子王國網民火火山存有大量毫子，令她深感無奈：「平時買嘢嘅時候，找續收埋啲毫子，𠵱家儲咗好多，有乜方法可以用咗去？」網民eyan建議，「買飛搭車，我之前都係咁用晒啲兩毫子，而一毫子就用嚟搭巴士，好快就用晒㗎！」
學校小賣部冇人詐型
不過，作為精明消費者，網民amypekkle說：「買飛搭車？是指買地鐵、火車、輕鐵車票嗎？但係搭地鐵用八達通有九折喎！用散銀買單程票唔抵㗎。」另一位網民peaceaa1122曾經在街市買餸時，被小販拒絕收毫子，「我去買魚肉，買十蚊畀四個五毫子佢，魚檔老闆話唔收。」
此外，有網民提議：「去郵局買郵票啦！」也有人表示：「畀阿仔做零用錢囉！佢哋喺學校小賣部買嘢畀毫子，都唔會有人詐型㗎！」除了透過消費「清洗」毫子外，網民idaandho建議大家用毫子做善事，「若果你唔介意，可以捐咗去！我見到捐款箱，就會捐咗啲毫子，不過每日唔會多過兩蚊！」