娛樂圈盛產緋聞情侶，是真是假，其實十居其九都有迹可尋。
從戲裏到戲外，方力申和鄧麗欣（Stephy）這對緋聞情侶可謂絕配。外間都將兩人當成一對，可是他們卻互相「嫌棄」對方：「食肉獸」小方大爆最討厭「齋姑」Stephy，齋姑則篤爆只沉迷打一款game的小方是超級大悶蛋。
表面上一個向左走一個向右走，可是一不小心就露了餡。話題一扯到繼後香燈，小方說要生三個，想了兩個名字，尚欠一個，Stephy即極速賜名：「另一個囝囝可以叫『方便』，又或者『方程式』都唔錯。」細心得連緋聞男友囝囝的名字都想好了，這份體貼，豈止緋聞情侶咁簡單？ 撰文：比華利
方力申和鄧麗欣屬同一經理人，03年合唱情歌《好心好報》已辣㷫緋聞，去年他們在電影《獨家試愛》再扮演情侶，令緋聞炒得更熱，同時還加入了「第三者」導演葉念琛，劇情更加精采。
自組成情侶檔後，小方和Stephy經常拍拖搵銀，合作拍戲幾乎次次都有錫錫鏡頭。在新片《十分愛》裏，兩人在街頭纏綿咀嘴，Stephy更投入得拗腰相就；鏡頭一轉，早前大夥兒在首映後夜蒲蘭桂坊，其間吳雨霏遭老外搭訕輕薄，可是小方只懂龜縮躲避黐着Stephy，危急關頭正好說明最愛是誰。
-狗咬狗骨-
不得不承認，小方和Stephy確是非常合拍，不過兩人卻口口聲聲說只願做銀幕情侶，至於緋聞關係着實有澄清的必要，內容如下：
小方出招：難頂齋姑
小方說：「Stephy嘅缺點係唔食肉，每次大家食飯都唔知點就佢，咁樣嘅飲食習慣會畀朋友好多唔方便。」Stephy聽到反應極大，反唇相稽：「我反而覺得你成日掛住食肉唔食菜，飲食習慣好唔健康喎！」其實兩人大可選擇吃西餐，一人一份，問題不就解決了嗎？小方說：「唔通情侶拍拖，我鋸扒，佢鋸菇咩？」記者提議他可以跟朋友吃飯時才大快朵頤做食肉獸，小方即幽默地說：「唔得，咁即係偷食，呢樣係男人大忌。」
Stephy還擊：悶爆game迷
Stephy也不甘示弱，力數小方無時無刻都沉迷打機，她說：「男仔鍾意打機其實冇問題，不過佢打咗成年都係同一款遊戲，仲係冇乜畫面悶到爆嘅遊戲，每個見小方投入打機嘅人都覺得好煩。」小方也自知沉迷打機是追女仔大忌，他說：「將來我真係有拖拍，可以為對方唔打機，不過叫我戒肉就一定冇可能。」講到明兩人只屬火星撞地球，難做情侶。
-露餡-
小方呷亁醋：葉念琛變代言人
生活習慣南轅北轍，但一講起「第三者」葉念琛，小方即露出馬腳：「我哋每次接觸都只係喺工作時間，平時好少見面，佢（Stephy）嘅私生活方面可能有好多壞習慣，佢放咗工可能變咗另外一個人，呢啲我暫時都未揭發。有時我了解Stephy都係睇葉念琛喺《蘋果》嘅專欄，佢一講我就知係話Stephy。」平時牙尖嘴利的Stephy，此刻竟然只懂狂笑，招架乏力。
小方行年27，尚未娶妻，他說：「Paco（經理人黃柏高）成日教我，話男仔冇事業，將來邊有女仔肯跟你？我𠵱家都成27歲仔，梗係要搞好事業。我希望可以做個稱職嘅演員，等啲導演開戲時首選諗起我，冇人可以代替，呢啲先叫事業有成。」導演名單當中，肯定包括葉念琛。
Stephy爆響口：渴望生一對子女
自稱現時沒有女朋友的小方，最希望35歲做老竇，他說：「李麗珊個廣告話養大個細路要400萬，我將來目標想生3個，總數1,200萬，呢條數一啲都唔細。」同樣酷愛小孩的Stephy也渴望做母親，但她只會生一對子女，生育大計似乎與小方不合拍。
小方的理想是生兩子一女，兩兄弟要緊接出生，這樣兄弟情會較深厚，他說：「我同媽咪都幫佢哋改埋名，個女叫方芳，其中一個囝囝會叫方向，至於另一個名就未諗到。」Stephy馬上提供意見，她說：「另一個囝囝可以叫『方便』，又或者『方程式』都唔錯。」連BB名字都為對方想好了，點止工作拍檔咁簡單！
朋友戴綠帽Stephy告密
在電影《十分愛》中，方力申和Stephy再度扮演情侶，鍾嘉欣則與森美飾演夫婦，女方更是Stephy好友。後來楊愛瑾搭上森美，可是Stephy卻未有向鍾嘉欣揭發實情。
問兩人現實生活中若發現自己好友的另一半有外遇時，會否做金手指打小報告？Stephy說：「我一定會坦白同朋友講，仲會將個真相原原本本講出嚟，一定唔會加鹽加醋。我嘅出發點唔係要拆散朋友，只係維護朋友，唔想佢俾人呃。」
小方則因為撞過板，好心沒好報，反而令兄弟情疏遠了，所以堅決不會再做「金手指」，他說：「你話情侶親啲定朋友親啲？梗係拍緊拖嘅親啲，瞓埋同一張床嘅點會唔親過朋友？如果講咗搞到人哋分手又好尷尬，唔分手大家連朋友嘅感情都疏啲，既然係咁，我寧願扮唔知。」
後記：鹹豬頭
拍照當日，攝影師一聲令下埋位，Stephy慵懶地坐在椅子上，本來站着的小方即主動坐在地上，身子輕微靠近Stephy，女方順勢擺出一臉受落的「情侶」表情。當攝影師要求兩人再靠近一點時，小方即大搞氣氛說：「再挨埋去，我個頭會揩到佢（Stephy）個胸。」拍戲時四唇交叠都試過，鹹豬頭？邊有人信呀！
攝影：仇志德
髮型：VincePang（ILColpo）
服裝：Monalisa
場地：Baci
