葉劉噚日出席一個講回歸10年前瞻與回顧嘅研討會，同題目有關嘅嘢好悶，反而葉劉講舊上司煲呔精采好多，佢話煲呔一世夠運，葉劉同煲呔做咗十幾廿年同事，佢話煲呔符碌，信得過啦。
力挺楊日昌
八方問葉劉煲呔邊鋪最符碌，佢卻玩封口，仲話千祈咪話佢寸煲呔好彩，亦唔係話煲呔冇料，呢句最絕，「搵到個好運嘅人做特首，都係好事嚟嘅！」暗踩完煲呔，葉劉變招再砌多兩拳，勁讚肥龍處事孭得起，人緣好、又肯幫同事，政府內種種疑難雜症都落手落腳搞得掂，因此個個AO好like肥龍。
AO唔係幾妥煲呔係官場公開秘密，葉劉為乜咁講，唔使八方解畫，佢越講越興奮，話有啲高官最叻「閃避功夫」，一有鑊就諉過於人，毫無承擔，好似應科院單嘢咁，呢頭決定同楊日昌續約，轉頭又話人哋係大包袱，呢啲官員需要再教育，學吓乜嘢叫做原則。葉劉冇點名邊個官員要再教育，八方提醒吓讀者，條友係何宣威。
葉劉講到收唔到口，好似當年挺23條咁挺楊日昌，指佢任內招攬唔少人才，台灣、新加坡搞科研都好大使，楊日昌冇功都有勞，官員唔可以俾人鬧幾句就放棄原則，十幾廿萬人上街都唔使怕。唓，又講番23條嗰筆，老土。