以煲呔為首嘅特區政府，不斷將香港人嘅集體回憶抹甩擦走，天星碼頭一夜間俾人隊冧咗，家吓輪到54歲嘅皇后碼頭等住被蹂躪。無權無勢嘅小市民梗心痛啦，原來飲香港水大嘅發哥周潤發都好傷感，噚日凌晨專登揸車去碼頭影相兼簽名撐皇后，臨走前仲好有氣勢咁同喺碼頭露宿搞抗爭嘅「本土行動」成員講：「如果真係得嘅（原址保留）時候，你哋就係英雄！」
拍跳海戲飲「皇后水」
發哥近年去咗荷李活掘金，原來佢一啲都冇忘本。發哥同八方講，佢以前成日喺皇后碼頭拍跳海戲，可能飲過幾啖「皇后水」，對嗰度零舍有感情。佢又話早年曾經喺碼頭度影過啲沙龍送畀發嫂，𠱁到老婆好開心，家吓碼頭就嚟拆，佢舊地重遊影多輯相當悼念囉。
發哥話，見到成班後生仔為咗保住皇后碼頭不惜瞓街，呢種熱情令佢好感動，佢好無奈咁話：「我都知政府決定晒啲嘢，𠵱家話唔拆都好難搞，但點都好啦，希望第日唔好乜都拆啦。」
巨星凌晨探班 興奮到震
皇后碼頭今個月26號報廢後，睇嚟難逃一劫，十幾個「本土行動」成員𠵱家24小時留守，當正碼頭係屋企，希望政府畀條生路行吓，突然有位國際巨星探班，成班後生仔興奮到震，以為自己發緊夢，皆因發哥喺凌晨4點幾以一身causalwear出現，好多人都未瞓醒，而佢劈頭第一句就問：「你哋諗住撐到幾時？」
在場人士同八方講，大家望清楚真係發哥，異口同聲大嗌：「撐到政府肯讓步為止。」發哥一副服晒表情。
之後，發哥抬出腳架同古董相機喺碼頭周圍影，半個鐘之後先返嚟同班後生仔傾偈，見大家揸晒相機，佢來者不拒逐一搭膊頭影相，有人問佢支唔支持保留碼頭，發哥好豪咁話：「我嚟咗就等於支持啦！」跟手仲簽埋名㖭，臨上車時更舉起拳頭同大家打氣。
有份瞓身保護皇后嘅成員同八方講，唔少電影人都希望繼續喺碼頭拍戲，拍《父子》嘅譚家明導演同《香港製造》嘅陳果都簽咗名，家陣連發哥都出面撐，希望政府收回成命，至於上述「發哥撐皇后」精采一幕，有片為證，大家可以去「香港獨立媒體」網站睇。
網址 http://www.inmediahk.net/public/index
