過渡期時做反對派的左派政團，回歸後沒有搖身一變成為當家作主的權力骨幹，反而在八年董治時代下慘烈「陪葬」，左派銜頭令他們抬不起頭。萬料不到殖民地遺將曾蔭權兩年前強勢登場，卻為與政府綑在一起的左派帶來生機；保皇不再成為負資產，「𠵱家我哋話支持政府，把聲都大啲。」本地最大愛國愛港政團、民建聯主席馬力這一句心底話，究竟道盡了多少左派中人回歸10年的辛酸？ 記者：許偉賢
曾經，在過渡期內任《基本法》起草委員會秘書長的馬力以為，回歸後左派的角色更加吃重，事實卻不然。「回歸前，我哋同前港督彭定康一起成長，佢嚟到專搞政治，我哋就明顯反對派；回歸後梗係覺得，係自己政府喇，要支持喇，點知啲（前）港英官員，仍然接受唔落（左派）。」
初期不獲高官信任
結果是回歸三、五年後，政府高官對他們始終不存好感。「當時有啲官員淨係同反對派打交道，你啲親中左派，梗係叫阿董搞掂你，阿董搞唔掂咪中央搞掂你囉，佢哋根本唔care（關心）你哋點諗，對我哋真係唔太畀面。」
為回歸出心出力的左派，難免感到不是味兒，但忍辱負重始終是左派強項；政府當你冇到，仍可以咬着牙關捱過去，只是前任特首董建華弱勢管治下的日子，實在一天比一天難捱，因為「政府當時要我哋支持得嘅，梗係啲難啃嘅，總之就係好嘢就唔益你，大鑊嘢搵你落叠、搵你陪葬。」
《基本法》第23條立法就是一個活生生的例子。當時政府處理不當，左派萬箭穿心，支持立法的民建聯首當其衝，成為群眾攻擊對象。「我哋當時同佢一齊綑綁一齊撐住上，結果係點？就係賠上咗我哋嘅政治本錢，真係好傷。連曾鈺成咁支持政府嘅人都會話有辱無榮，好明顯係好感慨，畀我我都講唔出。」
董建華的有心無力，換來曾蔭權發夢也想不到的特首寶座，竟然也為左派政團帶來重生機會。絕非根正苗紅的曾蔭權，思想感情上與左派有一定距離，「開頭大家磨合係要好小心，咩都要三口六面講清楚，大家互信程度始終唔大，大家對大家都有猜疑。」
馬力承認，一直至05年政改一役，曾蔭權始發覺民建聯原來最切實可信，雙方關係漸見好轉。
更重要的是，曾蔭權領導下的政府既強勢又得民心；左派就算再與政府拍住上，也不會成為票房毒藥。「保皇，以前係抬唔起頭，係好負面嘅，因為個政府根本做得唔好。但係𠵱家唔同，你睇𠵱家啲官員，聲都大啲，條腰都直啲，政府處於強勢，我哋支持政府，聲都大啲啦。如果個政府做得比較似樣，保皇就唔會再成為負資產。」
「土共不外如是啫」
強勢還強勢，曾蔭權始終要跟着時代走，與政黨甚至民眾展開平起平坐式交往。馬力不忘勸勉一句：「放下身段係好嘅開始，大家平等對話，係現代政治嘅趨勢。如果你（煲呔）覺得自己仲係高高在上嘅話，我可以話你聽：呢個時代已經過咗。」
左派這個標籤，回歸初期就像洪水猛獸，市民聽到都嗤之以鼻，以為受盡中央眷顧的左派，回歸後肯定盡享榮華富貴，支配特區發展，馬力也受了不少氣，「嗰啲人郁吓就土共土共咁叫你。」10年時間卻驗證，「土共原來都不外如是啫，佢哋無權無勢又無錢，普通香港人嚟咋喎，有乜好驚？」
民建聯最痛的兩件事
問到民建聯十年最痛，馬力想了一想便說：「應該係程介南事件同區議會慘敗。」態度輕描淡寫。2000年立法會選舉前夕，程介南被揭發涉嫌以權謀私。此事馬力形容為「諗唔到咁杰」，「事發後內部調查跌成十幾個百分點，真係嚇都嚇餐死。」
三年後，因為挺23條立法導致區議會選舉失利，馬力最心痛當時市民覺得保皇黨不負責任，「一聲吹雞就乜價值觀都擺埋一邊。」7.1遊行一句「踢走保皇黨」口號傷盡不少黨員心，最終要他「無端端」代替曾鈺成走馬上任做主席，更是萬料不及的「意外」。
只是，兩件「大鑊」事件發生後，民建聯依然屹立不倒，更成為本港第一大黨。
回歸10年倒數63日