有邊個女人唔想嫁個有錢人？「愛美麗」柯德莉塔圖（AudreyTautou）繼《達文西密碼》（TheDaVinciCode）後，返回法國老家主演愛情喜劇《珠光寶戲》（Priceless），今次佢演活專釣金龜兼戀愛導師嘅情場可人兒，集高貴、性感同調皮活潑於一身，呢部關於有錢人vs窮光蛋嘅喜劇，亦被視為柯德莉夏萍（AudreyHepburn）61年主演嘅《珠光寶氣》（BreakfastatTiffany's）07現代版。 撰文：戶川淳
下周四（5月10日）正式喺本地上映嘅《珠光寶戲》入面，柯德莉塔圖扮演以嫁個有錢人為人生目標嘅法國妙女郎Irene，佢釣得金龜男友，名牌衣着同銀行附屬咭一應俱備，只欠一張婚書，但陰差陽錯下竟搭上由法國諧星加德艾馬力（GadElmaleh）飾演嘅性格羞怯男子Jean，仲同對方一見鍾情。可惜佢哋關係被金龜男友撞破，仲一怒下同Irene分手。
利用舊愛呃富婆
一心諗住同阿Jean開花結果嘅Irene，喺呢個時候先發現原來Jean只係打腫臉充闊佬嘅窮光蛋，佢當然即刻就閃咗去啦。人財兩失嘅Jean後來到南部散心時，竟被一名富婆「睇中」，同一時間Irene又再次出現，佢竟然自發當上Jean同富婆嘅戀愛導師，一場騙金又騙色嘅愛情再次上演。
其實導演彼亞薩爾瓦多利（PierreSalvadori）同編劇喺構思劇本時，已經覺得柯德莉塔圖係女主角嘅不二之選，柯德莉喺片中亦瞓身演出，打扮性感，仲罕有地露Bra示人，睇過套片嘅外國影迷都讚柯德莉氣質好高貴，導演安排每一樣嘢都好有品味，唔係好表面咁扮富貴畀觀眾睇，秉承法國愛情片浪漫到暈嘅優良傳統！
南法靚景睇唔停
仲有唔可以唔提係片中嘅靚景，電影喺法國南部取景，由於呢一區東接意大利，南鄰地中海，一向被法國人視為後樂園，大家睇戲仲可以睇到FrenchRiviera、普羅旺斯-阿爾卑斯-藍色海岸（法文：Provence-Alpes-Coted'Azur）同蒙地卡羅酒店（Monte-Carlo）等著名嘅旅遊度假勝地。