上周見證運氣大逆轉，致兩日計出現少許虧蝕；今次主打賽事用番英超賽事，捧護級大過天嘅錫菲聯W，作全日重心，冇直播睇，唔代表唔好賭喎。
上星期六貼英冠全中，包括李斯特城「客勝」同高車士打「大」；但去到禮拜日，狼隊補時12碼宴客致輸波，令單注同過關飛盡斷，補一條荷甲雙雄大炒對手波膽，結果兩隊各欠1球，時也命也。自信有實力，有時都要講吓運氣，最重要不損元氣，下次咪重新上戰場咯！
今次推介唔贏冇命嘅錫菲聯，上仗作客查爾頓幾乎贏埋，呢隊波遇強即縮，遇弱即生，尤其主場勢兇夾狼；今次面對降班膽屈福特，個人認為贏面有9分。
賓科士打近期慌失失
屈福特近期開始放開懷抱（可以話有啲亂章），包括打433陣式，同出番久休嘅射手馬龍京治；另外季後重返曼聯嘅門神賓科士打亦出現跌watt情況，遇上個人認為幾支下游分子中、最有隊型嘅錫菲聯，今場難保不失。
錫菲聯隊中，有被筆者多位同事嘲笑屎波嘅箭頭史廸，其實佢啱晒打呢類下游護級隊，希望今日為人為己，爭氣入番兩三球，幫隊波攞埋呢3分，踏上護級坦途，同時令筆者喺FantasyLeague奪回本月榜首啦！夠薑者，博埋錫菲聯贏兩球嘅「主勝」亦可。
諾域治鬥修咸頓博「大」
另一場，敲諾域治同修咸頓鬥攻開「大」，前者喺踢風流波下有射手安梳爾壓陣，後者仲未夠分踢升班附加賽，隊波攻強守弱，呢場分分鐘有5、6球交收都未定！
重心出擊
主客和
錫菲聯勝
蘋果波神
狂迷英國波，尊崇雲格；成與敗，視乎你是否找到真快樂！