近期盤路異常難捉的西維爾，周日在西甲迎戰同屬歐協盃4強分子的愛斯賓奴，觀乎對手在聯賽已無欲無求，且有兩射手停賽，我可繼續博西維爾開W，就算[-1]都捧「主勝」。（球賽編號：星期日34；有線61台今日11:00pm直播）
愛斯賓奴留力歐協
上周西甲貼西維爾作客贏皇馬，輸；歐協盃再貼他們贏奧沙辛拿，再輸。今晚西維爾再度出場，畢傑冇理由唔共同進退，反吼愛斯賓奴咁衰仔。其實，再博西維爾贏波並非拗頸，因愛斯賓奴現排第10，要爭歐洲賽資格難，要降班又未到他們，鬥心難與要爭聯賽錦標的西維爾相比。
此外，愛軍教頭華維廸早揚言，就算歐協盃4強首回合已領前雲達不來梅3:0，但周四次回合仍會排出最強陣出戰。換言之，預期今仗如廸拉彭拿、查基及薩巴列達等主力或被收起，要是出戰亦不會踢足全場。何況愛斯賓奴有兩名前鋒彭廸安尼及加西亞費南廸斯停賽，形勢輸蝕不如連其餘主力亦收起，留力歐協盃才搏殺。
西維爾周四同樣要在歐協盃次回合主場出戰奧沙辛拿，但巴塞隆拿上周聯賽失分，致兩軍目前僅餘1分積分差距。因此，西維爾為爭標又好，為歐協盃次回合壯行色又好，必藉主場贏波振奮士氣。文：畢傑
首球推介：基沙哥夫腳風順
基沙哥夫今役正選機會大，且腳風頗順，首選；捷西斯拿華斯越戰越有表現，助攻射門同樣出色，連拿度傷癒復出，23倍有得諗。
貼士
星期日34
西維爾VS愛斯賓奴2：0
讓球主客和：H主勝
盤口：西維爾[-1]
半全場：主/主