近排大家對風水師呢三個字特別敏感，好似噚日美聯集團喺記者會上，失驚無神話有位薄有名氣嘅風水師，斥資逾2000萬掃咗深井碧堤半島5個單位，席上行家即時起哄，不斷追問呢位風水師係咪姓陳，答案：唔係。不過，市傳呢位闊綽買家，係當年曾經演出電影《大迷信》一角嘅早一代著名堪輿學家林國雄。
就買樓一事，華華噚日致電林師傅求證，但佢助手話：「師傅出咗門，幫你唔到。」消息稱，近年已甚少露面嘅林國雄，早排親身到碧堤半島實地視察，雖然唔知有冇帶埋羅庚，但聽聞佢認為樓盤背山面海，風水好，而今次所買入嘅第1座5個高層單位，一律1010呎，係喺最近兩個禮拜內買入，消息仲話，林師傅係同埋其他朋友合資買嘅，打算揸住，睇長線。