每個人買股票都有自己嘅一套心得，有人憑感覺、有人睇走勢圖捕捉入市時機、有人跟風炒作，當然亦有人買股之前審慎考慮。網友桃李喺《香港討論區》話：「建議買大陸地產股嘅人，買之前要返內地睇吓佢哋嘅示範單位，未見識過而買咗大陸地產股嘅人，仲衰過隔山買牛。」
Baggioooy問：「咁買江西銅（358），又使唔使買佢啲銅睇吓質素；又或者睇吓大連港（2880）啲水清唔清；搭吓國航（753）飛機，睇吓好唔好坐。」
大長賓就話：「咁安莉芳（1388，主業做女性內衣）咪只有女人先至可以買囉！」
買殯儀股咪要死
CWPSl：「要買做殯儀嘅嘉利盈（8029），咪要……」語錄：「長實（001）啲樓夠成日有大把人話縮水又漏水，又唔見一號仔表現好差！」
網友估怪就認為桃李嘅買股睇法，原則上係好嘅，但做起上嚟有啲難度。Cupid850910好同意咁講：「睇示範單位係買樓用家嘅心態，不過，買股係要睇嗰間公司搵得多唔多錢，我唔知道中國海外（688）同富力地產（2777）整出嚟個單位係點，但係佢哋嘅盈利同股價就不斷咁升。」