日前NAMTAIEEP（2633）宣布，以每股5.056元（人民幣．下同）及5.261元出售合共8060萬股TCL集團A股，合計套現4.16億元，預計獲利約3.28億港元。雖然呢個絕對係好消息，惟NAMTAIEEP年前發盈警及低價私有化行動已傷盡股民嘅心，連續兩日出現高開低收。
不過循呢個方向諗，A股資產大升值的確有可炒之道，而持有A股資產最豐富嘅，一定先諗長城科技（074）。長科股改後持有長城開發（000021）49.54%股權及長城電腦（000066）47.82%股權，前者昨升逾4%至17.59元，該股去年底股價僅8元；至於後者昨亦升逾4%至11.92元，而去年底股價僅5元多。
呢兩隻A股於06年半年結中連同手持現金以「現金及等值物」項目列賬，涉及金額僅26.47億元，不過計一計數，長科所持長城開發市值已升至76.6億元，持長城電腦則值26.15億元，合共102.75億元。長科H股有4.54億股，連同非流通股有11.98億股，以昨收市價2.80元計，總市值33.5億港元，折讓大得驚人。
駿新爆上或有後着
長科隱藏資產還不止此，旗下多家附屬公司，其中持有61%股權的深圳易拓科技及43%股權的深圳開發磁記錄，早前分別流傳將分拆上市，屆時又多兩隻「等值現金物」入賬。另外，早前長科母公司長城集團併入央企嘅CEC，變成直屬國資委，里昂估計長科亦都係有機會注資嘅公司，要炒嘅概念真係多到數唔晒。
駿新（091）噚日大陽燭爆上升22%，成交額逾1.5億元，自從上月底復牌以嚟未見過咁大成交。上月公司宣布以每股0.30元配股集資約5800萬元，據聯交所資料顯示，GalaxyChinaOpportunitiesFund於當日以每股平均價0.53元在市場購入駿新1.025億股或9.55%，另「有人」透過德銀申報於當日持有駿新6.63%，再於上月中增持至9.36%。由於是次集資講到明係搞清潔能源之一嘅煤層氣，噚日如此大成交炒上，好有可能係項目快將公布。
歐陽風