《電車Go》系列大家都玩過，不過一般都係以日本鐵路系統做背景，玩得多風景都熟口熟面，所以終於衝出日本，選中剛通車嘅台灣高鐵作為模擬駕駛嘅對象。新作名稱叫《Railfan》，會喺PS3上推出，畫面能以1080p高清水準重現高鐵行駛時畫面，由於遊戲係得到台灣高鐵公司協助，高鐵南北雙向一共700公里風景，都能以實景拍攝及於PS3上重現，再透過PS3機能處理，玩家能一嘗處身駕駛室內，感受高鐵由靜止加速到最高300公里嘅快感，而因應高鐵嘅設計，會分成13段加速操作，比日本列車一般只有6、7段更多變化。
兼任旅遊指南
除咗實景拍攝，連列車行駛聲音、鳴笛及列車廣播都收錄在內，遊戲內會有國語廣播，夠晒原汁原味！玩家更可以睇到高鐵詳細介紹、車廂模型，過足癮！遊戲仲可變身旅遊指南，收錄有高鐵沿線景點及美食，亦有詳細相片同交通指示，連《電車Go》都無咁多嘢睇！介面可選擇中文及英文。遊戲預定第二季推出。