散戶同賭仔一樣，都係姓賴，但點都諗唔到，前幾日港股跌，散戶賴到冇嘢好賴，連國寶大熊貓都唔放過。William_Ng喺《香港討論區》話：「隻國寶熊貓未落嚟香港，港股已經跌百幾點，正式運落嚟，咪有可能跌成千點！」
唔要熊貓要公牛
好彩，國寶606同610（家吓應該改口叫「樂樂」、「盈盈」）噚日搭飛機嚟香港，港股生生性性升番130點，唔係又淪為跌市代罪羔羊。
不過咁，迷信嘅網友即時留言話唔明點解改個咁唔老嚟嘅名，Siushant仲話：「今勻真係會輸到『落』晒『形』！」有網友喺討論區要求香港政府唔好接收中央送嘅大熊貓，應該改為向美國要求贈送大公牛，最好就係芝加哥嗰隻㖭！
Spirit2008亦話：「對熊貓落嚟香港，對後市梗係有啲啓示嘅！」Triple6就認為：「啓示咪喺其中一隻編號606度囉！」
兩隻大熊貓之前喺大陸分別叫606同610，上市公司中糧控股（606）同惠記集團（610）就係用呢兩個上市編號，前者跌咗3日，一周累積挫12%，收6.25元；後者噚日止跌平收2.98元。兩隻股股價近日偏軟，好可能受到熊貓嘅向下引力牽引。
中糧插水慘贈興
大隻金擔心後市，「啲熊貓食竹三餐，咁我哋遲吓咪有可能三餐食粥水。」
Luklk1亦好唔滿意咁批評：「隻中糧今日逆市跌近半成，家陣攞景定贈興，高盛仲調低佢嘅目標價到5.8元，睇嚟隻股後市都係凶多吉少喇！」
但Soho123就認為有危就有機，「股市『落』，要有『盈』，梗係要買PUT輪沽空賺大錢喇！」
Joeycky亦話可能暗示「快樂地有盈餘至真。」