年初同政府貼錯門神嘅九倉主席吳光正，先喺尖沙嘴地王海運大廈嘅續租問題僵持不下，跟住又為九鐵九龍南線計劃嘅廣東道站選址問題傾唔掂數，吳主席咁勞心勞力，上年度喺九倉𢭃嘅人工當然係最高嗰位，有950萬，總酬金達1560萬銀，相比前年微減11萬蚊（0.7%），但對吳主席嚟講濕濕碎啫，而且仲要睇埋會德豐年報先知。
咁佢都冇待薄得力助手，以副主席兼常務董事吳天海，總酬金1111萬銀，加咗少少，0.2%咁啦，佢去年嘅人工其實只有385萬，但加埋同業績表現掛鈎嘅花紅呀咁，就多過高級副主席李唯仁，後者酬金930萬就遜色咗啲，睇晒九倉旗下收租物業嘅李玉芳酬金都有差唔多663萬。