朱古力同女生的肌膚一樣，最好當然係滑到溜手，不過除咗滑，女生仲要不斷美白美白及美白，相反，朱古力就愛越來越黑，從來無話鍾意白朱古力，而黑朱古力的受歡迎指數就keep住上升。最近M&M'S及SNICKERS等老牌朱古力零食牌子都爭相推出darkchocolate口味，再行一轉supermarket、小食店，就發現更多的黑朱古力小食，如果你受得苦，更可以挑戰自己，試吓100%的全黑朱古力！
記者：黃若茵
攝影：伍慶泉、黃子偉
模特兒：Chrissie@PureModels
越出越Dark
幾年前食darkchocolate，最多都只係60%至70%左右，近一兩年突然冒出多個歐洲，甚至日本牌子都推出70%以上的darkchocolate，我自問最多都只係食到80%，苦得來都還有些微甜味。但市面上竟然100%都有，除了苦及酸味，丁點兒甜味都無，搵路人試食個個都苦瓜亁咁嘅樣，若你怕捱唔到苦，都係慢慢由低百分比開始試食啦。
試食產品：CUORENERO100%原味黑朱古力$35（b）
越黑越開心
「黑朱古力由於少咗糖份，所以會較牛奶朱古力健康，但可可本身都有脂肪成份，點都會有一定的卡路里。可可本身含有鐵質及礦物質，黑朱古力因為可可成份高，亦令這些對身體好的物質成份更豐富。同樣吸收後會令人情緒開心的多巴安成份亦更多，所以食黑朱古力會比食牛奶朱古力更開心㗎！」
夾餅亁食正！
其實食朱古力都是想尋開心，又何必食到叫苦連天！所以市面上不少黑朱古力的零食都會配埋餅亁一起，可將苦味中和，口感亦更有層次。今次將大量黑朱古力及特濃朱古力晒冷，大部份都比純黑朱古力甜，容易入口。
黑朱古力×紅酒=絕配
曾勝出05年瑞士朱古力創作大賽的Thomas絕對稱得上是甜品專家，對於darkchocolate他認為是懂得享受及講究的人的心頭好：「市場上推出多種不同%的黑朱古力，未必人人接受得到，一般以64%-72%較多人接受。我認為近年法國的朱古力做得唔錯，比利時亦開始追上。至於食黑朱古力，用甜酒、干邑、紅酒皆可以，但一般來說用紅酒配襯比較廣泛，最能夠帶起可可的味道。」
其他苦味
（a）7-ELEVEN22991110
（b）ctiy'super25062888
（c）零食物語27979967