近年Google、YouTube等急速冒起，資訊科技嘅威力再次令人刮目相看；噚日一個飯局上，滙豐香港區資訊科主管鄭小康就話，資訊科技唔再似以往咁，只係企業嘅一種後勤支援，而係制訂生意策略創新嘅催化劑。資訊科技總監喺企業嘅角色越嚟越吃香，以前資訊科技總監要向營運總監滙報，𠵱家有趨勢係直接向行政總裁滙報，而企業嘅最高決策會議，亦要資訊科技總監列席，仲出現資訊總監升做企業行政總裁嘅情況㖭。
咁香港喺呢方面嘅出路，香港電腦學會會長李惠光話，香港搞區域性數據中心大有前途，𠵱家香港嘅數據中心全部爆滿，最大問題係缺乏地點，佢哋已建議政府修改工業土地用途，容許發展數據中心，相信到時個行業將以倍數增長。
點解香港喺呢方面咁吸引？佢分析係電訊收費平，電力穩定，進口IT設備免稅等都係優勢。咦，鄭主管同李會長幾時學咗我哋特區嘅煲呔曾，做資訊科技呢瓣嘅推銷員？！