晚晚睇劇集《溏心風暴》，夏雨成日撚住幾隻雙頭鮑，隻隻有手掌咁大，真係引到人流晒口水。唔講唔知，鮑魚是有炒價、仲可以保值的，平均每年價格都有一定升幅，回報一定好過擺喺銀行收嗰啲啲利息。加上去年高峯期已過，今年鮑魚價錢有回落，就好似之前恒指咁跌一跌，所以𠵱家應趁低吸納，掃貨係時候喇！
記者：梁學文
攝影：伍慶泉
日本鮑＝大藍籌
市面的亁鮑魚多來自日本、南非及東南亞地區，尤以日本鮑魚最矜貴，所以是入貨首選，可以說是鮑魚界的大藍籌，長揸長有，無論吉品、網鮑或禾麻，儲3年至5年，價錢最少升2至3成。安記海味的潘生，家族經營海味生意，擁有幾隻日本3頭網鮑，他說：「呢幾隻日本網鮑喺15年前用$8,000隻買入，嗰時因為用來影相留起咗，一直留到𠵱家，今時今日變成無價寶，有多多錢都買唔到，亦係鎮店之寶。」炒鮑魚的首要秘訣，就係要大唔要細、貨源少最矜貴。買鮑魚時，最好揀大隻的用來保存，至少有保值機會。
炒鮑魚＝炒股票
炒鮑魚同炒股票差唔多，一定要留意社會經濟發展，經濟好的話，鮑魚價格亦會被帶動上升。好似近幾年，鮑魚價格不斷升升升，都係因為經濟好轉，老字號的海昌號老闆兼香港海味雜貨商會主席波叔話：「經濟好至有人食鮑魚；經濟唔好，價錢平都無人要。近年鮑魚價格變動同整體環境有關。」以05同06年做比較，一隻日本吉品鮑的價錢就升咗2成，換句話講，入到貨就有得賺。「基本上每年嘅鮑魚價格約有1至2成的升幅，如果碰巧貨源少及缺貨的鮑魚，升幅就更勁。好似雙頭網鮑，𠵱家入到就真係發達，不過近10幾年都冇貨返，有錢都未必買到。若果要保存，首推一定係日本鮑魚，生長環境嘅水質及陽光都好好，鮑魚質素非常高，儲幾年一定無蝕。」
揀好貨5大要點
4.色澤夠鮮
5.有鮑魚香味
南非鮑越來越矜貴
究竟最抵炒係邊款鮑魚？潘生推介南非鮑魚：「向來南非鮑唔可以同日本鮑比較，因為品種問題，價錢始終差一截。不過今年情況有變，南非政府今年將鮑魚列入瀕危受保護動物，漁民不可隨便捕鮑，就算係人養鮑魚，都要有牌至可以賣，總之要限制出口數量，由舊年250公噸，大幅減半至今年的125噸，貨源少咗，價錢自然升。」要炒鮑魚，真係要留意個市，仲要留意埋國家發展，潘生不愧為專家。
潘生推介升值鮑
No.1極品日本3頭網鮑
15年前購入價$8,000/隻
雖然呢隻係潘生無價寶，10幾年來價錢不停升，就算同類型網鮑都要幾萬蚊一隻，所以升值能力一定高。
No.2日本9頭吉品鮑
今年購入價$40,000/斤
成年來貨都唔夠10斤，𠵱家入貨過幾年肯定會升。01年入貨價約$10,000，舊年已經要$22,000，足見其升值潛力。
No.3南非27頭鮑
今年購入價$2,480/斤
咪睇小南非鮑，其實好有升值潛力，皆因貨源越來越少，潘生話呢款最啱短炒，至少有2成回報。
出貨首選海味舖
有價有市至有得炒，仲要摸頂出貨至得。雖然𠵱家網絡發展發達，不過鮑魚始終係高價貨品，就算真係有人上網Bid，都無人敢買，始終有一定風險，買到假貨。所以多數都會向海味舖着手，有靚貨都係搵舖頭出貨，波叔話：「買賣海味要去香港海味雜貨商會會員的舖頭，因為真係誠實可靠。」
溏心鮑要夠曬
溏心係指切鮑魚時會感到啜刀，即代表鮑魚質感好，食落彈牙有咬口。要食到溏心鮑魚，最少要等4個月。鮑魚買返屋企後，要每月1次於10am至12nn底面反覆曬2小時太陽，之後放於陰涼位置等鮑魚亁水，行內人稱之為吽鮑魚。香港天氣較潮濕，搞到鮑魚曬完都好似濕濕哋咁。最佳保存方法係放入雪櫃，溫度大約零下4至5oC，一來可保亁爽；二來可保其金黃色澤。
安記（25446336）
地址：上環急庇利街8號地下
海昌號（25478080）
地址：上環德輔道西118號地下