意大利不愧係狗仔隊發迹地，一張圖片就可以作個絕世古仔出嚟。《米蘭體育報》就話巴塞隆拿球星朗拿甸奴同教練列卡特個女拍拖，於是唔去AC米蘭喎！
常隨隊同球員混熟
呢個報道係3分實、7分虛，冇錯列卡特個女叫蓮茜，係佢同首任妻子所生。由於蓮茜成日隨隊出外比賽，好自然同球員打成一片，咁就難怪意大利傳媒會煲佢同「細哨」有不尋常關係囉！
講真，「細哨」咁花心，𠵱家仲畀緊巴西私生子同佢媽媽嘅贍養費，列卡特又點會推愛女落火坑呢？更何況，雖然「混血」嘅蓮茜樣貌都幾出眾，但係巴西黑人好仰慕金髮碧眼美女，對蓮茜呢隻白中帶啡嘅類型，未必會受落！而且，𠵱家亦有傳列卡特下屆未必教巴塞，咁唔通佢諗住帶埋「細哨」一齊過檔新球會咩？
不過，荷蘭教練嘅女或者親戚，又似乎特別同球星有緣，好似告魯夫就將個女嫁畀前巴塞門將積蘇斯，古列治個老婆又係告魯夫個侄女，雲邦美嘅老婆就係前飛燕諾同多蒙特教練尹馬維克個女。