今年4月放大假，我決意一嘗歐遊兼滑雪，但冬季已過，唔係度度都有得滑雪，最後睇中西班牙巴塞隆拿北面嘅Masella，無火車直達唔係問題，索性玩大啲租埋車自己揸。在網站發現有個當地滑雪套票，包埋租車服務及食宿，一條龍好方便，拍板！誰知訂好後問題接踵而來，車款、波箱類型、GPS導航等，起行前搞到我一頭煙！雖然旅程最終都玩得好開心，不過今次租車事件絕對可用慘烈嚟形容，錯漏百出兼兜遠路，咁「寶貴」嘅反面教材，的確值得拎出嚟同大家分享吓。
記者：陸伊琳
攝影：陸伊琳、Nero
小心！租車避免中間人
3日2夜滑雪套票，每位225歐羅（約港幣$2,400），包雪場LiftTicket、住宿、膳食、48小時的租車費等，都幾抵。訂下來才發現，Package只包棍波車，車款只限三門揭背車仔！4個人3個篋，點夠塞？再者一向懶慣的我，揸開自動波，人生路不熟仲要揸棍波，真係NoWay。
由於經旅行網站訂購，所以一切都要聯絡中間人，原本可以好方便直接去租車網揀車，結果都要拜託中間人，但歐洲人工作效率慢半拍要成個月先回覆我：「要Upgrade大車、自動波，換AudiA4吧，加多264歐羅啦（約港幣$2,818），你無得揀㗎喇！」吓？加2千幾蚊，咁係4門房車定旅行車？房車肯定唔夠擺行李，可唔可以要求7人車或是旅行車呀？最後居然石沉大海，無回覆，電郵到租車公司，回答都是問番你個中間人吧，激死！
加錢！乜設備都無
原來歐洲較流行棍波車，一來慳油，二來當地Highway多，少塞車，揸棍波都無所謂。但我哋想了一輪，按我們能力係應該加錢換自動波。但最大問題係GPS導航，我出發前SendEmail要求相關設備，結果又係石沉大海，我只好先在網上列印定導航地圖出嚟，以備不時之需。我們選擇在巴塞隆拿Sants火車站攞車，不幸租車公司大排出龍，原來正值當地長假期，特別多旅客租車旅行。宣傳單張說GPS導航租機費每天8.9歐羅（約港幣$95），我們本以為鬆口氣，立即嚷着要租，但店員說假期無存貨，反問我們為甚麼訂車時不要求，十分抱歉！唉，真係有苦自己知。
迷路！一條隧道兜4次
可能太多人等攞車，工作人員忙個不停，都唔知佢走咗去邊，惟有高舉防盜車匙周圍「嘟」，嘗試去搵車，最後見到架黑色A4有反應，果然係4門房車，尾箱根本放不下3個大篋，只好後座放一個，搵人攬足全程！
在市中心的橫街窄巷，「人肉導航」已出現問題，4個人七嘴八舌，卒之花咗半小時先上到Highway。從網上Print下來的導航地圖有用武之地了，但要注意，西班牙路牌好易令人混淆，地方名時有時無，又一堆符號跟代號，加上手上導航地圖指示不清，一時叫你車頭朝A駛，朝朝吓改向朝B嘅地方，之後又朝番A，混亂中同一條隧道居然走咗4次，兼夾白花了10歐羅（約港幣$106），經驗教訓還是睇大地圖穩陣，記住目的地個名及Highway號碼，最後花多了一倍時間先到達。
手尾！記緊入滿油還車
租車時派了張指引，其一在路上爆胎，叮囑不要立即下車，要遇到警察及油站地方先停下，因為會有路霸搶劫！其二記緊入滿油先還車，否則有額外附加費，更要小心唔好入錯油，我們的A4是柴油車，車身有大大隻字寫住Diesel，再唔明唔使怕醜，問油站職員。柴油油費超平，每公里只約港幣6毫子，至於架車嘅表現跟一般電油版A4無乜分別，只是行車時感覺雜音較多，可能同出租車有關啩。回程時由於有經驗，所以我們再沒有迷路，在預定時間到達巴塞隆拿機場還車，算係HappyEnding。
租車旅行小貼士
1.選擇一些分店較多的租車公司，方便在不同地方取車及還車。
2.盡量揀選5門旅行車，乘客舒服點，亦可載運大件行李，毋須逼餐懵。
3.提早預定GPS導航儀，亦要在網上列印定導航地圖，以備不時之需。
4.自動波租車費用比棍波車略貴。
5.預鬆車程時間，以防迷路大失預算。
6.注意租車費有沒有包保險，保險費絕對不可慳。
7.入滿油才還車，雖然好多油站都是自助式，但可請教油站職員。
8.租車不要貪平，可能會有里數限制，超額要加錢。
9.記謹帶備國際駕駛執照。
租車資料
AudiA42.0TDI
（租車每天92.27歐羅起，約港幣$984）
查詢：www.europcar.es
3日2晚滑雪租車住宿套票
（每位225歐羅，約港幣$2,400）
查詢：www.activitybreakseurope.com