打機變打交嘅文化絕對由Wii帶起！點解？《MarioParty》呢類小遊戲PartyGame，對戰競爭意味已非常濃，今個星期新返《震震遊戲公園》，將Taito好多經典遊戲人物，變為做章魚燒、刨冰、揀壽司等Mini遊戲，全部要喺電視前轉Fing掹個Wiimote，仲想話靚女扮矜持？咁咪即輸到下位囉！
文：陳福榮
攝影：伍慶泉
Model：Mandy、Isis、Isabel
靚女Model試「打」！
平時約Model影相，鏡頭前永遠靚Pose；今日試玩《震震遊戲公園》，惡女潛藏意識出晒嚟！轉Fing掹Wiimote已毫不留情，佢哋仲教記者，動作大啲可阻礙對手，必要時走埋佢面前，以「體術」遮住對手Sensor，就立於不敗之地，PartyGame險惡精髓就喺呢度！
經典名作大晒冷
可能Game界新鮮人或者對Taito呢個名稍為陌生，但如果同大家講《電車GO!》或者《太空侵略者》應該會有印象啲啩，當然最多香港人識嘅就梗係《泡泡龍》啦，無論係純動作定係考智力嗰隻，到𠵱家仲有唔少人喺機舖搵佢嚟餵機，可想而知有幾咁深入民心。既然點都係間堂堂大廠，出得派對遊戲又點會放過呢批經典名作？因此部份小遊戲係來自包括《泡泡龍》在內嘅陳年正嘢，將啲玩法係咁意扭橋又有全新面目見人，咁又點會唔係何樂而不為？
對戰絕對冇面畀
話時話，呢隻《震震》部份點子都有啲似舊年隻《緣日之達人》，都係由大量Cutie又正斗嘅角色同畫面構成，分別在於《震震》有唔少經典名作坐鎮，玩起嚟無疑會有較大投入感。雖然話就係咁講，但大家咪俾佢咁嘅畫面呃到，雙打嗰陣真係會打甩髀咁滯，佢有唔少玩法都係喺同一個畫面內互抽，係咁Fing個掣唔止好攰，郁啲仲會撞親隔籬個對手，初則口角繼而動武就係咁樣發生。
單身情侶一樣Happy
咪以為《震震》只係得啲低B小遊戲，冇乜挑戰性；其實佢仲設有追女模式俾大家去挑戰一下，夾雜住傳統日式美少女AVG元素，透過完成隨機抽選嘅MiniGame，根據玩成點同埋其間嘅對答選項，從而決定能否提高女仔對你嘅好感度。此外亦有一個兩人同玩嘅愛情挑戰模式，電腦會因應雙方合拍度，嚟計算出你哋到底有幾好感情，似乎準繩度隨時會準過啲把鬼心理測驗喎！
機種：Wii
廠商：Taito
類型：動作
人數：1-2人
價格：$338
售賣點：I-Gamer（27253338）
