見到電影Ｌ，順口問吓佢對於攞政府資助拍電影，有乜意見。電影Ｌ諗咗一陣話：「好過冇啦，不過政府資助唔會令電影業起死回生嘅，現在最打擊電影收益嘅係內地DVD盜版，如果我哋一套電影能夠從內地DVD銷量之中，每張DVD收番十蚊，呢行已經好好做，得鬼閒問政府攞資助咩。」
可惜呢，特區政府對內地電影盜版，愛莫能助，幫唔到手，呢樣嘢，留番畀「美帝國主義」壓迫中國開放市場好過，美帝嘅壓力如果令到內地盜版絕跡，香港電影掹住車邊都有好大着數。
電影Ｌ話𠵱家電影經營模式同以前有所不同，以往好靠戲院票房，但現時荷李活電影只願在票房收回一大筆，而唔願創紀錄，驚住太多人睇嗰套戲而唔買DVD。賣DVD，長賣長有，經典電影可以在全世界賣幾十年，先至係電影公司賺大錢來源，還有賣收費電視版權，免費電視版權，亦可收番一大筆。香港電影弊在本地票房曳，DVD盜版盛行，點樣賺錢？
港片賣埠又點呀？原來外地（包括歐美）最喜歡功夫片、黑幫片，識晒周潤發、成龍、梁朝偉、李連杰，但其他明星就生疏啲咯，周星馳嘅喜劇電影太多本地無厘頭笑話，外地唔識欣賞，唔識笑，當然冇咁受歡迎。咦，新聞報道講電影發展基金唔想支持情慾暴力黑幫電影，想話多啲鼓勵老幼咸宜家庭電影，其構思剛與市場需求相反噃。香港拍攝嘅黑社會電影喺世界上好有地位，今年《亞洲周刊》就報道過法國辦咗一個杜琪峯黑社會電影展，推崇杜琪峯喺呢方面嘅成就。另外，香港《無間道》拍得比荷李活《無間道》更加好呢！
特區政府為電影救亡，唔會有大效果嘅。官僚審批電影資助，左怕廉記，右怕審計署，怎麼辦？工商科技局局長王永平曾被問及如何整治香港電台，佢話：「唔好講整治，我哋只係想港台依公務員規矩辦事啫。」王局長好睇重公務員規矩，公務員要批准電影資助，唔依足規矩至奇，偏偏電影人係最冇規矩嘅！