正所謂相由心生，一個人小氣、心胸狹窄，個樣一定面目可憎；但假如為人大方、有容人之量，咁肯定連樣都變得順眼！呢個道理用喺車上一樣Work，就好似小記第一眼望見啱啱到港嘅新一代BMWX5咁，初時覺得佢肥肥仔仔成粒馬蹄咁，不過當知道佢內櫳大方闊落咗，仲可以由5座變7座咁有容人之量後，即刻改變睇法，何止話個樣順眼呀，直情覺得佢靚仔到啪啪聲！
記者：周達之
攝影：黃子偉
模特兒：Joey
高大咗又靚仔咗
話佢夠「大方」，係因為新X5比起舊款X5，無論喺長、闊、高都有顯著增長，舊款4,667×1,871×1,715mm，而新款就加到4,854×1,933×1,766mm，而話佢有「容人之量」，係因為新X5首次可以選配第三排座椅，即係話最多可以坐七個人，如果唔要七座嘅話車尾下面就會多90公升嘅空間嚟載貨。
無錯，我承認第一眼望見，X5的確似粒馬蹄，之但係知道佢咁胸襟廣闊後，立即覺得佢車身強悍有勁、灑脫有型，加大咗嘅胎軨令佢更有穩重嘅感覺，頭泵把換咗同X3差唔多嘅雙層款式，頭燈同引擎蓋亦變得更有肌肉感，至於流線得嚟起角嘅車身睇起上嚟更有層次感同剛勁，而呢個設計亦唔係得個樣，皆因新X5嘅風阻系數係0.33，係同級中最低嘅，即變相慳油同快咗。
天窗大到似開篷
雖則車身大咗，不過駕駛艙又唔覺比上代大得好多。鍾意佢嘅真皮座椅，坐起上嚟真係好舒服，只係嗰塊桃木紋理飾板有啲老餅，畀着我就會選用另一款鋁質刷面金屬飾板。頭頂有一塊大得離譜橫跨前後座嘅天窗，試車嗰日啲風猛喺頭頂吹入車，直情有種揸開篷車嘅清爽感覺。
要加到7座位，點都要顧及吓最後排乘客嘅需要，唔係話好似大排檔加兩張櫈咁就算，所以X5亦有4區分離式恒溫空調系統，冷氣分布平均，唔使搞到後排委委屈屈咁。假如你鍾意，亦可以加套後座影音系統嘅Option，套裝包括前座中央椅柄後面加個8吋LCD、DVD機、Remote同兩套Headphone，至啱一家大細家庭樂。
易到好似碰碰車
今次測試嘅係4.8公升版本，成4,799c.c.，馬力最高可達355匹，即使架車有成2噸幾重兼最多坐7人，但以呢個Spec嚟睇真係綽綽有餘。不過呢個世界凡事都係講等價交換，12.5L/100km嘅耗油量雖則絕對唔高，但自問未必用得盡佢馬力嘅都係揀3.0版本會好啲。
駕駛X5只可以用舒服嚟形容，因為實在有太多科技嘢嚟幫助你駕駛，唔可以唔提嘅係xDrive智慧型可變四驅系統，可因應路面改變前後軸嘅動力分布；而下坡控制系統可以幫你喺唔踩Brake嘅情況底下，以比步行稍快嘅速度嚟落斜，唔使驚標落山；起動輔助系統又可以幫你上斜起步唔後溜；除此之外你亦可以加Option嘅主動式轉向系統，令到高速時降低轉向比例使到行車更穩定，另一Option係主動防傾操控系統，佢可以減低車輛喺彎路中嘅傾側幅度。
咁多輔助系統，上到車真係淨係負責扭堂軚咁大把，查實同揸碰碰車無乜分別，姐姐仔都舞得掂。
新車速蘋
．空間大咗，仲可以加到七座
．外形更有肌肉感
．355匹馬力夠勁
．勁多駕駛輔助系
．改做七座版嘅話空間相對較窄
X5車系全球賣出60萬部
上代X5喺全球賣出超過60萬部，證明本身都有一班支持者。至於引擎就有3.0Inline6、4.4V8及4.8V8揀，不過聽聞最好賣係3.0版，唔知新版會唔會都係咁嘅情況呢。
BMWX5規格
引擎：4,799.c.cV8DOHC
馬力：355hp/6,300rpm
扭力：475Nm/3,400-3,800rpm
傳動：6前速Steptronic半自動、4輪驅動
尺寸：4,854×1,933×1,766mm
平均耗油：12.5L/100km
車重：2,245kg
車輛提供：BMWHK（27145271）