我悠穎馳平時無端白事都鍾意揸架車上飛鵝山睇月光，細妹悠娛思不懂情趣，成日話我嘥油兼唔環保。之但係我認為遊車河睇月光會令我開心、得到一個娛樂，咁呢幾升油就唔可以用「嘥」字嚟形容。至於環保嘅意思係「喺唔影響生活質素嘅情況底下盡量節省」。所以我唔會考慮石油氣汽車同混能車，前者入氣麻煩，後者車價貴，同樣影響到我生活。
不過家陣出現咗一樣嘢，既環保又唔影響我生活質素，呢樣嘢就係生化燃料Bioethanol；簡單啲講即係用植物嚟提煉燃料，呢樣嘢唔係乜嘢未來科技，實情係家陣日本已經正式引用。呢種由砂糖黍提煉出嚟嘅生化燃料，喺燃燒嘅時候完全唔會釋放出二氧化碳，而實驗證明喺普通汽油混入3%呢種燃料後，所得到嘅能量同百分百汽油無分別！日本現時將呢種混合汽油命名為Biogasoline，喺首都圈內嘅50個油站已有供應，3年後擴展至全日本。最重要係售價同普通汽油無分別，完全跟我嘅環保原則無抵觸，呢啲先至係真正嘅環保嘛。
悠穎馳
豪邁不羈，愛車如命，聽幾下引擎聲就知咩車！