港股期指結算，股民好失望，花旗股市繼續升，但港股就跌咗140點，仲係全日都冇乜威過嗰隻。話個市要大跌又唔多似，話佢大升，又好似冇乜力，喺咁嘅環境，大家一係收拾心情放假，一係就只有炒新股。
呢排新股招股嘅情況都幾好，但係上市後嘅走勢就認真麻麻，第一日掛牌雖然上升，之不過多數都係無以為繼，第2日就散番落去。好似昨日掛牌嘅中信銀行（998），升幅只有14巴仙，都幾失禮，前日掛牌嘅洛鉬（3993）算係近期表現最好嘅新股，前日掛牌升咗59巴仙，昨日再升近1成，睇個勢下禮拜一仲會炒上，只可惜冇輪炒。
新股嘅熱潮暫告一段落，如果個市唔可以抽上，成交會縮減影響個市嘅氣氛。下禮拜二係5月第一日，呢個時候淡友就會開始走出嚟叫口號，SellinMayandgoaway，上年呢句嘢就幾應景，今年會唔會都係咁邪呢，遲吓就知嘞。
不過，睇個市陰陽怪氣咁，都似係暴風雨嘅前夕，呢句話唔係單係同好友講，淡友一樣要有所警惕，現貨成交唔細，期指交投同未平倉合約都好勁，下禮拜二又係假期，唔理造好造淡，對於持倉嘅水平都要小心考慮，唔好去得太盡。
兗煤C輪3716：兗煤（1171）昨收8.21元，逆市升1.48巴仙，技術走勢幾好，連續第2日企喺10日線樓上，升破8.45元，後市會有嘅睇頭，可以睇9元樓上，兗煤C輪3716昨收84仙，槓桿率9.8倍（有效6.1倍），對沖值0.65，可以買番多少，正股升上9元，3716應該升到1.19元樓上，正股跌穿7.85元止蝕。