神秘人TonyChan堅決不露面，可憐佢位太太就成為籠中鳥，畀狗仔隊成日跟住，去邊度都畀人影相，失去私隱。冇法啦，記者日日要寫起碼一版故事，苦無挖料方法，唯有二仔底死跟陳太。
爭產官司其實唔止與法律有關，公眾意見亦好重要，到官司真係開審之時，有邊個市民未睇過關於TonyChan嘅報道呀，到時選陪審員，問你點會選到一位全無預設意見，完全冇「偏見」嘅人士？除非被選中嘅，個個都係足不出戶，不吃人間煙火嘅隱士啦。
個個記者都追東尼陳，《南華早報》「利是」喺星期一爆料，話肥佬黎喺九十年代初期搵過東尼陳替《壹週刊》睇風水，唔怪得《蘋果》寫爭產新聞，情節特別豐富咁話！「利是」開玩笑吖還是講真㗎，咁都知？《壹週刊》喺一九九○年創刊，社址在鰂魚涌華蘭路華蘭工業大廈，入伙之時，據左丁山所知，冇搵人睇過風水喎？唔通肥佬黎神神秘秘，識得東尼陳，搵佢幫吓眼？
現在就唔知，以前左丁山問過肥佬黎：「你開咁多間佐丹奴分店，有冇睇通勝，揀吉日良辰先至開業呢？」肥佬黎即刻媽媽聲：「啲舖租咁貴，如果裝修好之後仲要擇日開張，萬一成個禮拜都冇一日好日，我咪蝕晒啲租？你都儍嘅，睇乜通勝呀！」咁嘅人會搵人為《壹週刊》睇風水，唔似喎。
出咗位東尼陳，人人不問蒼生問鬼神，跟住又將風水師妖魔化，講到落降頭！今日香港，惑眾妖言之多，令人想起老子道德經：「五色令人目盲，五音令人耳聾」，當然，千億遺產，令人發狂。今期興講道德經，順德畢菲特非常熱心，喺香港誦經後又飛去西安參加道德經論壇，拜神時念念有詞，祈求抱男孫。大人物都讀道德經咯，我哋不妨又睇吓吖，希望睇得多就會知道無為勝有為嘅道理，知足者富。否則終日羨慕他人發達，恨自己入錯行，就一定冇老子咁長命！老子有百餘歲，或言二百餘歲，信不信由你。