兩個禮拜前，錦興集團（275）股價突然大幅飆升，一日之內，由3.58元衝上5.35元，大升5成，之後股價回落到5.0元水平整固，噚日收4.98元，又係一次吸納機會。
股價大升，必然有因，主要係公司在本月11日做咗「披成」，配售4350萬股，每股3.4元，貨源應該係落晒強者手中，股價先有如此強勢反應，而在高位亦無沽壓（噚日成交亦只104萬股），有貨在手者，人人都惜貨如金，看來公司好快就會有大動作。
其實，錦興現時股價具備晒大升嘅條件。首先係業務單純，主要係投資控股，持有逾10億元嘅上市公司CB同債券，另外仲有幾億元現金。
第二，經配股後，發行股數2.52億股，大股東德祥企業（372）持股量1.7億股，但比例攤薄至57.36%，加上配股亦冇出街，街外流通量實際不足4000萬股，街貨市值只係2億元。
第三，錦興現時市值約12億元，唔大唔小，最適合轉型，公司在配股時已話到明會投資天然資源業務，有消息話有關洽商已進行得如火如荼，可能會拍住外國嘅礦業公司一同進軍開礦業務，好事已近。
變相拆細更易炒
第四，德祥係殼王陳國強嘅旗艦，今次進軍礦業，相信係連串大動作嘅第一步，「殼王」變「礦王」，錦興嘅猛料肯定會陸續有來。
去年9月底，錦興每股資產淨值9.3元，近期股價雖大升，但相對仍屬偏低。另外，公司在配售之時亦建議一送十紅股，變相「拆細」之後，細細粒，仲易升。
去年2月，錦興股價亦曾升上5.0元水平，今次再發力，在5.0元水平整固一下，好正常，現時走勢形成上升三角形，若升破5.2元降軌阻力，而又有大成交支持，將確認整固完成，升浪再起，照度上去，上升目標係7.0元。除淨後，每股股價0.64元，好易上番1字頭。