花旗銀行4月初喺香港、上海兩地，搵咗861個18至22歲嘅後生仔做「財金商數」調查。華華忍唔住讚吓港人好努力積穀防飢，九成年輕人有儲蓄習慣，38%有做兼職。相反，逾七成上海新一代收入嚟自屋企，35%話每月使晒所有錢，13%嘅受訪者仲話會用信用卡透支。
講到投資目的，兩地青年首選準備成家立室。第二個原因呢？68%嘅港青話希望退休有保障，68%滬青話賺多啲買嘢咋。另外，逾600個受訪者話35歲可賺到第一個100萬。點賺？44%港青話先儲蓄後投資，40%滬青話創業最好。
花旗（香港）財富管理業務總監連錦東教路，如果喺22歲開始，每月投資3000蚊，每年回報率5%，10年應該夠70萬元，何況加人工又投資多啲，百萬富翁其實唔難做到。
[email protected]