碧桂園上周五掛牌，噚日即有新鮮熱辣嘅06年年報。大家都想知道中國最新首富年薪幾多，登登登登……創辦人兼主席楊國強舊年全年人工146.1萬，比05年大幅增加逾一倍。
不過，相比睇中楊國強將會成為中國首富嘅恒基地產主席李兆基，06年度（至06年6月底年度）𢭃739.7萬，中國首富同四叔嘅人工，真係蚊髀同牛髀。
咁啱，市值僅次碧桂園嘅中國內房股中國海外，噚日亦出咗年報，董事長孔慶平舊年袋756萬，加薪4.5%。另一間廣州地產商合生創展，行政總裁武捷思都有752.2萬人工。楊主席又係中國首富，會唔會慎重考慮大幅加薪呢？仲有，真正持有碧桂園六成股權嘅楊國強二女楊惠妍，05年加入公司，全年𢭃70.7萬，舊年只𢭃38萬，減薪46%，乜解究呢？
[email protected]