時間：1994年4月
地點：香港
人物：包青天
經過：名人藝人撞衫時時有，一年計計埋埋起碼十單八單，但講到電視台「撞劇」鬧雙胞就真係好少有，最經典莫過於94年4月無綫同亞視就劇集《包青天》嘅播映權起風波。
話說93年無綫話事人邵逸夫（六叔）獨具慧眼，買咗台灣華視嘅長篇劇《包青天》嚟播，初時全世界人都唔睇好，諗住呢部翻拍嘅劇集咁老套，一定衰梗，點知部劇一出，全城哄動，劇中飾演包青天包大人嘅金超群紅到發紫，仲帶挈飾演展昭嘅何家勁鹹魚翻生。
事情發展峯迴路轉，到94年4月，因為該劇嘅海外版權合約上出現錯漏，俾亞視喺台灣以外嘅地方買到《包青天》版權，仲安排同無綫喺同一時段播出。當年兩間電視台各自聲稱有《包青天》嘅合法播映權，日日喺報紙展開罵戰，公說公有理，就算包大人出馬都搞唔掂。
當時亞視為咗殺無綫一個措手不及，不但唔公布首播當日究竟播邊個單元，仲特登比無綫提早一分鐘播出，搶無綫班觀眾。雖然結果都係無綫收視贏亞視幾條街，但呢件「雙包案」就好似摑咗無綫一巴兼剃埋眼眉，亦都係繼麗的（亞視前身）《大地恩情》打到《輪流傳》腰斬之後，無綫開台以來另一大恥辱。
本欄逢周一至周六刊出