近期憑主持無綫搞笑節目《愚樂ILoveU》火速上位的二人男子組合ILoveUBoyz（簡稱艾粒），成員Donald和少爺占至叻在鏡頭前扮鬼扮馬，但鏡頭後他們的私生活原來更見精采。大前晚艾粒各自拖女到又一城欣賞《蜘蛛俠3》優先場，其間少爺占對女友非常癡纏，掃背又攬腰；Donald則背着緋聞女友阮小儀明媾「圓潤版張娜拉」，表現如懷春少男的他異常緊張，竟由平日的伶牙利齒，變成口窒窒兼震騰騰。
由艾粒主持的無綫搞笑節目《愚樂ILoveU》，上周播出的平均收視有26點，即約有169萬觀眾收看，成績相當理想，兩位主持Donald和少爺占在節目中擔任整蠱專家，效果爆笑，博得觀眾好感兼上位成功。其實近期紅爆的艾粒，私底下的感情生活也相當有趣，30歲的少爺占較穩定，早已跟拍拖9年的圈外女友冼燕珍（Tina）在鯉景灣築愛巢同居。
親熱全餐
摸髮掃背攬腰搭膊
33歲的Donald雖然自稱名草未有主，去年卻因與商台DJ阮小儀拖手逛街而傳出緋聞，關係耐人尋味，本來Donald和小儀也不失為一對「金童玉女」，沒想到男方日前竟趁小儀到日本旅遊期間，以荷李活勁片《蜘蛛俠3》（Spider-man3）優先場誘「圓潤版張娜拉」落叠陪睇戲。
大前日艾粒主持電台節目後，即分頭到又一城商場欣賞10時開場的《蜘》片，戴口罩的少爺占偕DJ朱薰先到i.t時裝店睇衫，手持雨傘的Donald則與一名貌似韓國女星張娜拉、略帶babyfat的長髮少女到場，但男方表情尷尬，與圓潤版張娜拉傾偈時又扭扭擰擰，與平日的伶牙利齒判若兩人，女方幾乎被他悶暈，倚在欄杆既篤面又扁嘴，Donald見狀表現得更加尷尬。
其後二人步往戲院會合少爺占與女友Tina、朱薰和DJ細So等，一行7、8人排隊入場時，少爺占擁着女友摸髮、掃背、攬腰兼搭膊，看在眼裏的Donald則狂吞口水，儼如含苞待放的懷春少男般，但他只敢偷望圓潤版張娜拉，臨入場時才開始埋身黐實她。至凌晨約12時電影播放完畢，少爺占便駕駛其價值50萬元的寶馬新車載女友齊齊返家，Donald則傍實圓潤版張娜拉步往火車站方向，目送她乘的士離開，其後再獨自返商台繼續開工。
等住被養
「驚俾小儀五馬分屍」
昨日艾粒在九龍城接受記者訪問時，提到拖女睇戲一事，Donald說：「我約咗個中學同學睇戲，佢冇嚟到，但叫咗佢細妹嚟，佢得19歲咋。」提到他當晚媾女如拉牛上樹，他說：「真係唔係媾佢呀，第一次見都唔知傾乜。」他更直言的確是瞞着小儀約女睇戲，Donald說：「我係瞞住佢，有咁嘅諗法，但驚俾小儀五馬分屍，要小儀養我㗎，因為佢拍龔如心傳吖嘛，佢拍呢套戲會認識顏福偉，我希望可以得到一支白花油。」至於少爺占則坦言與女友感情穩定，但又公開不婚宣言道：「我認定佢係終生伴侶，但唔會結婚，因為要畀禮金，想慳番啲錢。」
採訪、攝影：娛樂突發組、李珮洳
最高蘋嬸
艾粒至興暗藏攝錄機拍低整蠱人嘅過程，佢哋對鏡頭咁敏感，但竟然唔知自己媾女過程入晒鏡，精靈形象即時跌晒watt，真失望！
蘋果娛樂特派評述員蘋嬸
