時間：1990年2月
地點：香港
人物：葉子楣
經過
藝人拍戲好多時都會發生意外，所以事前往往會買定保險，不過淨係為個胸買保險，葉子楣應該係香港開埠以嚟第一個。
八、九十年代，葉子楣憑40吋巨胸叱咤風雲，真係誰「乳」爭鋒！外號「波霸」嘅佢，當年唔單止成為城中話題，而且片約不斷，名利雙收。
自爆驗胸過程
90年嗰陣，葉子楣向美國一間保險公司為自己個胸買保險，保額係200萬港紙。保險公司受保之前，要幫佢做個詳細檢查，例如照Ｘ光同電腦掃描等。嗰陣好多人認為葉子楣嘅咪咪大得咁誇張，可能係人工改造，所以佢今次投保，除咗為自己嘅生財工具買個保障之餘，仲可以證明自己係真材實料，加上佢係香港開埠以嚟第一位女星幫自己個胸買保險，真係夠晒噱頭。葉子楣仲自爆驗胸過程，繪聲繪影，唔到你唔服！
不過，自從03年葉子楣同醫生男友呂錫照拍拖之後，就開始淡出娛樂圈。舊年記者撞見佢同男友拍拖，驚見昔日波霸由葫蘆身形變成水桶姨姨，真係歎一句：歲月催人！
本欄逢周一至周六刊出