好多人或者有以下經驗──原本打算去超市或百貨公司買少少嘢，但到頭來就買多咗一大堆無謂嘅減價貨；又或者買咗啲貴嘢返屋企，連自己都唔知點解。不過，TheSimpleDollar話呢種現象其實係有得解釋嘅，佢喺《MSN》就講出喺大型連鎖店擺咗咩陷阱、令客人無端端增加消費，仲教網友點樣見招拆招。
陷阱1：入口放購物手推車
唔少人去超市原本都只係想買一兩件產品，可能單靠一雙手都夠拎啲貨去畀錢，但衰在貪方便，係唔係都推住架購物車四處逛，結果一見到減價貨，有理冇理放入車先、慌死執輸。就係咁，超出預算買多好多嘢。
【破解法】盡量避免推車，如有需要，可改用手提購物籃。
陷阱2：貴價貨擺當眼位置
同類產品都有高低檔之分，平價同貴價貨嘅擺放位置亦會經過悉心安排。高價貨通常會擺喺最當眼嘅較高位置，低價貨就多數放喺最低嘅貨架。
【破解法】踎低唔會噴飯，但就有機會搵到價錢較平嘅產品。
陷阱3：正價貨掛大型價牌
就算係正價貨，超市有時都會掛一大塊價錢牌喺貨架頂，等人以為係減價貨，其實呢類貨品，往往係同類產品中最貴嗰款。
【破解法】出發前準備張購物清單，寫低買開嘅價錢，如果唔敢肯定眼前見到嘅係咪最抵價，索性唔好買。
陷阱4：貨品標價難作比較
同款產品，但唔同重量或劑量嘅包裝，標價都盡量唔用整數，等你想即時心算計下邊款抵啲都好難。
【破解法】帶定部計數機傍身，或者用手機內置嘅計算機功能自行格價。
陷阱5：寬闊通道誘客留步
舒適嘅購物環境，尤其係寬闊嘅通道，可以畀客人有足夠嘅活動空間，悠閒咁推住購物車四圍走。只要客人願意喺貨架前面停步揀選產品，購買嘅機會就會大大增加。
【破解法】揀啱要買嘅產品，就要即刻去收銀處畀錢，就算途中昅到新款有趣嘅產品，都千祈唔好停低。