葉翠翠去年和李逸朗甩拖後，即展開單身新生活，近日她不止搬新竇，由元朗殺出灣仔，身邊更湧現大批狂蜂浪蝶，前晚她到金鐘出席首映禮時，被蔡淇俊和黎諾懿兩位新紮小生夾實狂冧，但兩男最後不及已婚大隻佬鄭健樂（Rocky）手瓜硬，Rocky爭贏做護花使者送伊人返香閨。
葉翠翠和李逸朗甩拖後，即由西環愛巢遷往元朗，與父母同住，但始終山長水遠，交通費小數怕長計，故她一直秘密搵新竇，至近日她終遷進灣仔區一幢已有24年樓齡的舊樓，單位面積620呎，月租約10,000元。
爭攝位黐伊人
自從搬屋後，23歲的葉翠翠生活轉趨活躍。身邊常有狂蜂浪蝶的她前晚到金鐘出席《明明》首映禮，身穿薄紗上衣打扮性感，不時惹來有份參演《同事三分親》的新紮小生蔡淇俊注意，男方「攝」到她身旁，不停講笑話𠱁她開心，但憑演《十兄弟》出位的黎諾懿此時忽然加入戰圈，黐實女方傾偈，頓令蔡淇俊一面沒趣。
其後黎諾懿和葉翠翠發現記者拍照，馬上各自打橫彈開，一直在旁的胡定欣即主動黐埋黎諾懿身邊，與他並頭拍照，但男方雙眼只望實葉翠翠，到入場時，蔡淇俊則緊隨葉翠翠身後，欲死跟同坐睇戲。
鹹濕狗捐裙底
至11時散場時，葉翠翠身旁男伴竟換上已婚大隻港男鄭健樂，由男方負責送她返歸，其間曾有一頭鹹濕狗追着葉翠翠，不停侵襲其裙底，令她十分狼狽，Rocky見狀卻咪咪笑，到送抵她家樓下時才離開，相隔一會，換上便服的葉翠翠又手抱一頭小狗落樓，帶牠到公園散步後才返家。
對於獲三位男藝員獻殷勤，葉翠翠昨日接受記者電話訪問時說：「係咩？冇呀，以前我鍾意睇俊俊（蔡淇俊）做嘅兒童節目，近排大家見少咗，咁啱見到面傾偈啫。」問她會否覺得蔡、黎有追求之意，她說：「冇啦，𠵱家係有追求者，但工作為上。」她又稱灣仔新竇是其親友住所，稍後會另覓居所。
採訪、攝影：娛樂突發組
