愛情可以令人在不知不覺間改變，像盧巧音與男友EricSo拍拖後，變得修心養性，不但Rock女變才女，打算出書之餘，加盟新公司後推出的新碟，也會改變歌路，不過她強調暫時無意嫁人，還想繼續工作。
盧巧音（Candy）自從與男友EricSo拍拖後便養尊處優，休息了差不多一年時間，當大家都以為她打算嫁作人婦，Candy忽然又活躍起來，加盟新唱片公司，打算月內推出全新個人大碟。
大談女權主義
不過從前的Rock女如今已不再Rock，Candy笑說：「今次想改變吓，唔想一味唱Rock歌，想畀樂迷新鮮感，成隻碟會以慢歌為主，本來想出一隻全部係鋼琴彈奏嘅碟，但係怕令人覺太悶，所以先冇做到。」
Candy還打算一嘗才女滋味，正與友人計劃出版一本談女權主義的書，她說：「因為覺得呢個年代嘅女人越來越犀利，其實我都好鍾意寫嘢，不過就未勁到出書，所以就搵另一個文筆好啲嘅朋友一齊合作出書，雖然十畫都未有一撇，不過相信我多數都會寫一啲自己同圍繞我身邊嘅事。」
睇書充實自己
問Candy會否將與男友的點滴也寫進書裏？她說：「可能會啦，未知㗎。」問她與男友相處時是否也堅持女權至上，Candy即甜笑說：「咁又唔係，我哋好似朋友咁，好平衡嘅。」
休息近年多的Candy，又強調自己並非完全沒事做，她說：「呢年我不停睇書、寫嘢，仲學過油畫，不過學咗幾堂就冇學，因為太難，同埋我嘅同學太勁。仲有聽番自己呢十年嘅歌，溫故知新嘛，睇吓有乜嘢做得唔好，將來做好啲囉。」如此修心養性，是否打算結婚後不再工作？她說：「嘩！梗係唔係啦，我同男朋友拍咗拖年幾，未有打算結婚。」
採訪：胡比 攝影：陳慧安
Hair：MattChinofXenterJut
Makeup：AngelYip
場地提供：Pax
