𠵱家香港嘅中、小學普遍缺乏理財教育，反觀歐美國家，近年已逐步將理財納入正規教育，以解決年輕人習慣先使未來錢嘅問題。西方國家重視理財教育，所以培養出畢菲特、蓋茨等世界級金融家同企業家。RaginCajun喺《MSN討論區》問其他網友：「點教細路理財？」
itsagreat2day講：「我個仔今年12歲，我要佢負責家庭財政，學習點樣量入為出。佢𠵱家識得格價，專揀特價貨嚟買，又識利用優惠券購物，儲埋唔少錢，有成1700美元。我將筆錢嘅大部份用嚟同佢買股票，等佢知道長線投資可以致富。」
收錢做家務 縱壞晒
chartcop話：「我細個嘅時候要幫屋企做家務，次次都有錢收，因為我媽媽要我知道，要賺錢就要畀心機做嘢。」SurlyGirl反駁話：「呢種教仔方法唔係咁好，因為子女有責任做家務，如果要畀錢𠱁細路做家務，啲細路就會變得好市儈。」
為怕金錢可能對小孩帶來傷害，蓋茨同當今世上好多富豪一樣，遵循「再富也不能富孩子」（即係幾有錢都唔好將太多錢畀子女）嘅教育原則，寧願大部份身家捐畀社會，唔會留好多錢畀仔女，以免佢哋變二世祖。